Шест пациенти заразени со коронавирус денеска се тестираат на Инфективната клиника. Земени им се брисеви и треба да се направат анализи дали се излекувале.
„Денеска на Инфективната клиника се прават 6 контролни бриса. Тројца од нив се во потешка состојба, еден е во среднотешка состојба и двајца се со лесна клиничка слика. Испитувањата се прават согласно времето кога се примени на Клиниката, кога е направен тестот и ова е анализа која ќе покаже дали сè уште се носители на вирусот без разлика на формата и клиничката состојбата“,
рече министерот за здравство Венко Филипче.
Се прави план за тестирање и на сите лица што беа во контакт со веќе разрешената директорка на Клиниката за кожни болести, која се зарази со коронавирус.
„Веќе се истечени 14 дена, сега се прави распоред и план да се тестираат овие денови кои се пред нас со цел да се вратат на работното место“,
информираше Филипче.
Поради контакти со докторката од кожната клиника, која се зарази по патување во Италија и одеше на работа, во домашна изолација беа ставени речиси 200 лица. Меѓу нив, двајца членови на нејзиното семејство, 64 вработени на клиниката, 11 пациенти што биле хоспитализирани таму, 13 што доаѓале во дневната болница, како и стотина учесници на семинар во Скопје на кој учествувала и таа.