Шекеринска демантира каква било поврзаност со семејството на Васил Јованов: Никогаш не сум се јавила за да побарам ургенција за сообраќајна грешка

Ваквата реакција на Шекеринска следува откако на социјалните мрежи почнаа да се шират шпекулации дека наводно таа влијаела кај судијката Даниела Алексовска-Стојановска да не го испрати младиот возач в затвор за претходните дела за кои бил обвинет

Заменик-генералната секретарка на НАТО и поранешна министерка за одбрана, Радмила Шекеринска, демантира и отфрла каква било поврзаност со 20-годишниот Васил Јованов кој смртно ја прегази младата Фросина Кулакова од Неготино. Ваквата реакција на Шекеринска следува откако на социјалните мрежи почнаа да се шират шпекулации дека наводно таа влијаела кај судијката Даниела Алексовска-Стојановска да не го испрати младиот возач в затвор за претходните дела за кои бил обвинет.

Санкциите не се одмазда, туку превенција од идни кривични дела – оценил Кривичен во пресудата против Васил Јованов за поседување дрога

„Длабоко сочувство до семејството и блиските на Фросина Кулакова. Од почит кон нивната болка и загуба не сакав јавно да реагирам, но гледам дека некои нелуѓе и криминални структури продолжуваат да лажат и да ловат во матно дури и при вакви лични, семејни и општествени трагедии и на необјаснив начин да ме ставаат во контекст на сообраќајката во која е убиена Фросина Кулакова. Најдиректно сакам да ги демантирам сите такви наводи – тие се целосна, безобразна и исконструирана лага за која не постои никаква основа. Одговорно тврдам дека со ниту едно од споменатите лица немам никаков контакт, познанство ниту пријателство ниту, пак, со сторителот ниту со неговиот родител, а уште помалку со судијката што одлучувала за неговите предмети. Со ниту едно!“,

напиша Шекеринска на својот официјален фејсбук-профил.

Таа нагласува дека никогаш не побарала кај никого ургенција за каква било сообраќајна грешка.

„Дополнително, сите што ме познаваат го знаат мојот став за овие прашања. Како и сите вие, и јас се плашам кога мои блиски ја поминуваат ‘Партизанска’ (особено кај ‘Силбо’). Како многумина од вас, и јас сум реагирала на беснеењето на возачите што мислат дека правилата не важат за нив и дека нашите улици се писта за нивните комплекси и покажување ‘сила’. И никогаш, ама буквално никогаш не сум се јавила на никој за да побарам ургенција за каква било сообраќајна грешка. Никогаш! Некои пријатели ми замериле поради тоа (што не сум ‘им завршила работа’), но сум стоела зад мојот став, бидејќи искрено верувам дека неказнивоста води кон повторување на делата, а тоа значи само чекор до трагедија“,

додава Шекеринска во реакцијата.

Таа вели дека обвинувањата што се шират против неа се без никаков доказ и нелогични бидејќи, како што посочува, во годината кога се носеле судските одлуки за Јованов, таа немала никаква функција.

„Никогаш за никого не сум се јавила за да побарам ваква ургенција и затоа бев шокирана кога видов дека некој почнал да шири вакви обвинувања за мене без никаква причина ниту доказ. Неточни се, но и нелогични бидејќи во годината во која биле носени тие судски одлуки, јас не сум имала никаква функција ниту позиција на моќ од која би можела да вршам такво влијание. За жал, очигледно е дека некои структури можат да продуцираат и најнелогични и целосно исконструирани лаги – доволно им е да имаат интерес и наредбодавател.
Токму поради трагедијата и потребата сите инволвирани да одговараат – се надевам дека ширењето невистини и обвинувања без основа нема да бидат искористени за да се кријат вистинските сторители и соучесници“,

се посочува во реакцијата на заменик-секретарка на НАТО.