Северноатлантскиот сојуз донесува одлуки со консензус, така што кандидатот мора да ја добие поддршката од сите 32 сојузници. Само Романија сѐ уште се спротивставува на кандидатурата на Руте, со оглед на тоа што таа позиција ја сака и романскиот претседател Клаус Јоханис
Генералниот секретар на НАТО, Јенс Столтенберг, денеска оцени дека Марк Руте е многу силен кандидат за негов заменик, откако холандскиот премиер во заминување ја доби поддршката од Унгарија и од Словачка.
Северноатлантскиот сојуз донесува одлуки со консензус, така што кандидатот мора да ја добие поддршката од сите 32 сојузници. Само Романија сѐ уште се спротивставува на кандидатурата на Руте, со оглед на тоа што таа позиција ја сака и романскиот претседател Клаус Јоханис.
Холандската телевизија НОС, повикувајќи се на извори запознаени со ова прашање, објави дека Руте ќе го наследи Столтенберг кој се повлекува во октомври по речиси десет години на чело на Алијансата. Ројтерс не добил коментар од НАТО за веста.
Процесот блиску до крајот
Столтенберг рече дека процесот на донесување одлуки е многу блиску до крајот.
„Мислам дека е очигледно оти во Алијансата сме многу блиску до финализирање на изборот на нов генерален секретар. И мислам дека тоа е добра вест. Мислам дека Марк Руте е многу силен кандидат. Тој има големо искуство како премиер, тој е близок пријател и колега и затоа силно верувам дека Алијансата многу брзо ќе донесе одлука за мојот наследник и дека ќе биде добро за сите нас, за НАТО и за мене“,
рече тој на прес-конференција со американскиот државен секретар Ентони Блинкен во Вашингтон.
Унгарија го поддржа Руте по минатонеделната средба на унгарскиот премиер Виктор Орбан со Столтенберг, на која двете страни се договорија Унгарија да не ја блокира одлуката на НАТО за поддршка на Украина, но и дека нема да учествува во неа.
„Премиерот Марк Руте потврди дека целосно го поддржува овој договор и ќе продолжи да го прави тоа ако стане следниот генерален секретар на НАТО. Во светло на тоа ветување, Унгарија е подготвена да ја поддржи кандидатурата на премиерот Руте за генерален секретар на НАТО“,
објави Орбан на социјалната мрежа Икс.