Шефот на Мосад најави дека ќе ги „лови“ сите членови на Хамас каде и да се наоѓаат

Неговото ветување доаѓа откако пред два дена Хамас соопшти дека заменик-шефот на Политичкото биро на Хамас, водачот Салех Ал Арури, загинал во воздушен напад во Бејрут

Шефот на израелската разузнавачка служба Мосад, Дејвид Барнеа, изјавил дека агенцијата ќе ги „лови“ сите членови на Хамас вклучени во нападот на Израел од 7 октомври минатата година, без разлика каде се наоѓаат, пренесува агенцијата Асошиејтед прес.

Неговото ветување доаѓа откако пред два дена Хамас соопшти дека заменик-шефот на Политичкото биро на Хамас, водачот Салех Ал Арури, загинал во воздушен напад во Бејрут.

Израел одби да ги коментира обвинувањата на Хамас дека стои зад ова убиство.

Првиот човек на Мосад направил споредба со последиците од убиствата на Олимписките игри во Минхен во 1972 година, кога посочи дека агентите на Мосад следеле палестински милитанти вклучени во убиствата на израелски спортисти.

Во експлозија во Бејрут е убиен еден од водачите на Хамас

Израел објави и дека е во состојба на висока готовност за евентуална ескалација со либанската Хезболах.

За Хезболах нападот во Бејрут нема да помине без казна, Израел подготвен на највисока борбена готовност

Според Асошиејтед прес, ударот во јужното упориште на Хезболах во Бејрут може да предизвика борбите со низок интензитет вдолж границата со Либан да прераснат во сеопфатна војна.

Водачот на Хезболах, Хасан Насралах, пак, вети одмазда, повторувајќи ја изјавата на неговата група дека ова опасно злосторство за убиството на Ал Арури нема да помине без одговор и без казна.

Според него, Хезболах досега бил внимателен во својата стратешка пресметка во конфликтот, балансирајќи ја потребата да се поддржи Газа и да се земат предвид либанските национални интереси.

Но, посочи и дека ако Израелците започнат војна со Либан, групата е подготвена за борба без граници.

„Ќе зажалат. Ќе биде многу, многу, многу скапо“,

рече тој.