На паркингот кај „Рамстор“ на „шверцерски“ начин е протната зграда која ќе биде висока 23 метри, a зголемување ќе има и на новиот објект на „КАМ“ кој се наоѓа на спротивниот крај на улицата и кој сега ќе биде повисок за седум метри, велат од „Шанса за Центар“
Во новиот Детален урбанистички план (ДУП) што се однесува за делот кај Старата железничка станица, на „шверцерски“ начин е протната зграда која ќе биде висока 23 метри и ќе се наоѓа на паркингот кај „Рамстор“, обвинуваат од иницијативата „Шанса за Центар“.
Со овој ДУП, што заеднички го изгласаа советниците на ВМРО ДПМНЕ и на СДСМ на вчерашната седница на Советот на Општина Центар, од „Шанса за Центар“ велат дека ќе има зголемување и на новиот објект на „КАМ“ кој се наоѓа на спротивниот крај на улицата и кој сега ќе биде повисок за седум метри, односно наместо досегашните 16, сега ќе биде 23 метри.
„Вкупно нови 15 илјади квадратни метри површина се најдоа во планот, во превод, многу милиони евра квадрати деловен и станбен простор“,
велат од „Шанса за Центар“ која во Советот на Општина е застапена со тројца независни советници.
Измените кои ги има во ДУП за овој дел од „Шанса за Центар“ велат дека се спротивни од планот даден на јавна расправа и спротивно на Генералниот урбанистички план, а базирани на одлуки од нова и попустлива Комисија формирана 2022 година која одлучила поинаку од Комисијата во 2020 година на барањата по Јавната анкета.
„Иронијата да биде поголема, во документот кој се однесува на заштита и спасување од урнатини, се вели дека објектите се високи 10,3 метри, планерката вели дека се 21 метар, а во измените на планот изгласани вчера се вцртани објекти со висина од 23 метри. Веруваме дека не се работи за превид или техничка грешка, туку намерна конфузија за да се отвори простор за профитерите-моќници кои очигледно имаат поддршка од оние кои треба да носат одлуки во корист на жителите на општината и заедницата“,
се наведува во соопштението од „Шанса за Центар“.
Според нив, на овој начин, резултатот од политичко-профитерската спрега, како што велат, ќе биде концентрација на моќ и заработка кај малкумина, а на штета на градот и неговите жители.
Планот, додаваат од „Шанса за Центар“, очигледно со затворени очи поминал со позитивно мислење од Дирекцијата за заштита и спасување и од Министерството за транспорт и врски.
Од „Шанса за Центар“ велат дека идејата била да се реши само проблемот на граѓаните на аголот од булеварот „Кирил и Методиј“ кон улицата „Водњанска“, но сепак не било само тоа, туку двете партии здружено изгласале ДУП со неточни податоци.
„Намерата беше со планот да се реши само потребата на жителите на ќошот од просторот кон ’Водњанска‘. Но, инвеститорскиот урбанизам победи и се задоволи алчноста на малкумина дополнето со интервенции од повисоко. Лекциите не ги научивме, секој ден сведочиме на институционална заштита на поединечни интереси наспроти јавниот интерес, кои ги остава Скопјани со уште еден ризик и нови бетонски чудовишта“,
се додава во соопштението.
Од „Шанса за Центар“ велат дека ќе ги искористат сите правни и административни механизми што ги имаат на располагање за да ја спречат реализацијата на овие измени за кои, пред јавноста лутите политички противници СДСМ и ВМРО-ДПМНЕ, очигледно нашле заеднички јазик.