Тој ги повика директорите од утре да ги отворат училиштата и да продолжат со редовно изведување на настава, без разлика на одлуката на раководството на СОНК
Министерот за образование и наука Јетон Шаќири на социјалните мрежи го изрази своето незадволство од одлуката на СОНК штрајкот да продолжи во основните и средни училиште, и покрај тоа што вчера Владата и СОНК постигнаа договор за покачување на платите на наставниците за 12 отсто.
„Зборот на СОНК не издржа ниту едно деноноќие. Одлуката на синдикалното раководство денес е променета и тоа на штета на нашите млади, учениците од основните и средните училишта. Министерството за образование и наука цени дека премногу настава е изгубена досега и тоа мора да престане. Доволно голем е јазот во знаењето кој го создаде овој штрајк со целосно блокирање на работата на училиштата и тој повеќе не смее да се продлабочува“,
напиша Шаќири.
Тој ги повика директорите од утре да ги отворат училиштата и да продолжат со редовно изведување на настава, без разлика на одлуката на раководството на СОНК, а упати апел и родителите да продолжат да ги носат своите деца на училиште.
„Ги повикуваме директорите на училиштата, како одговорни за организирањето на работата на овие образовни установи, од утре да ги отворат вратите на училиштата и да продолжат да организираат настава согласно законите за основно и средно образование. Имаат надлежности и одговараат за непостапување по истите. Исто така, ги повикуваме и родителите/старателите на учениците од утре да продолжат да ги пуштаат/ носат своите деца на училиште. Тие се најмалку виновни што губат настава поради несериозноста на една организација, но можат многу да помогнат во нормализирањето на состојбите“,
се додава во статусот на Шаќири.
На крај тој повика да не се уништуваат плановите на учениците, посебно не на оние кои годинава се матуранти.
„Да го завршиме ова лошо поглавје од тековната учебна година и да им овозможиме иднина на децата. Многумина од нив ги чекаат уписи во средни училишта или факултети. Многумина одлучиле да се вработат по завршување на средното образование, но неизвесно е доделувањето на дипломите во предвидениот рок. Да не ги уништуваме нивните планови и очекувања. Сите имаме одговорност!“,
заклучи Шаќири.