Според државната новинска агенција КЦНА, во Северна Кореја се изолирани и се лекуваат околу 187 000 луѓе откако „треска од неидентификувано потекло се прошири низ целата земја кон крајот на април“. Сепак, новинската агенција не прецизира колку ковид-позитивни има во земјата, но соопшти дека како последица на ковид во земјата починале шест лица
Севернокорејската новинска агенција КЦНА објави дека шест лица во земјата починале како резултат на коронавирус, а еден од починатите бил позитивен на високопреносливата варијанта омикрон откако по две години глобална пандемија во земјата беа потврдени првите случаи на ковид-19.
Како што јави „Гардијан“, според КЦНА, 187 000 луѓе во Северна Кореја се изолирани и се лекуваат откако „треска од неидентификувано потекло се прошири низ целата земја од крајот на април“.
„Околу 350 000 луѓе во земјата покажале знаци на треска, вклучително и 18 000 лица кои пријавиле такви симптоми во вторникот“,
соопшти КЦНА.
Сепак, новинската агенција не прецизира колку ковид-позитивни има во земјата.
Потврдата за првите смртни случаи во Северна Кореја доаѓа откако земјата соопшти дека воведува максимални итни мерки за справување со епидемијата откако коронавирусот се појави во главниот град Пјонгјанг, првпат по две години глобална пандемија.
Експертите веруваат, пишува „Гардијан“, дека веројатно ниту еден или многу мал број од вкупно 26-милионското население во земјата не се вакцинирани, а расте стравот дека епидемијата брзо би ги совладала лошо опремените здравствени услуги во земјата.
Според СЗО, во 2020 година Северна Кореја направила вкупно 13 259 теста за ковид, од кои сите биле негативни.
За време на воената парада во 2020 година, севернокорејскиот лидер Ким Џонг-ун им се заблагодари на граѓаните и војниците за нивната лојалност и што останаа во добро здравје против глобалната пандемија.