Според Филипче, евидентно е дека вирусот се шири меѓу невакцинираните – над 90 отсто од смртните случаи биле невакцинирани, а од новозаразените невакцинирани се 79 проценти
Од вкупната популација во земјава, вакцинирани се 37 отсто, што според министерот за здравство е мал опфат и е потребен многу поголем процес за да стигнеме до колективен имунитет и да ја смениме сликата со епидемијата
Сертификатот за вакцинација од октомври ќе се издава само откако едно лице ќе биде целосно вакцинирано, односно и со двете дози, а не како што е во моментов, кога тој може да се користи и само со една примена доза. Министерот Венко Филипче ги најави овие промени во мерките за октомври.
„Една од мерките, која сигурно ќе се препорача, но исто така ќе оставиме доволно време да помине, е потребата да се прикаже сертификат за најмалку една примена вакцина тоа ќе прерасне во потврда за целосно вакцинирани граѓани. Тоа ќе биде некаде во октомври“,
рече Филипче на денешната прес-конференција.
Дали ќе има и нови мерки, ќе зависи од анализата што во моментов ја подготвува Институтот за јавно здравје (ИЈЗ) и треба да биде готова во сабота. Таа треба детално да покаже каква е состојбата со бројот на новодијагностицирани случаи односно градовите каде се дијагностицирани, возрасните групи, опфатот на вакцинација во тие региони…
Вакцинацијата, оценува Филипче, се одвива добро иако во последните денови се бележи пад на интересот. За разлика од претходно, кога беа најавени и воведени мерките кога имаше во просек по 7-8 000 граѓани што се вакцинираа со прва доза, сега дневно прва доза примаат по околу 2 000 граѓани. Во моментов бројот на вакцинирани барем со една доза изнесува 767 000 граѓани од кои 667 000 се ревакцинирани. Пресметано во проценти, тоа значи дека од вкупното население над 18 години вакцинирано е 46 отсто додека од целокупната популација (со оние под 18 години) вакцинирани се 37 отсто од граѓани.
Ова, смета Филипче, е мал опфат и е потребен многу поголем процес за да стигнеме до колективен имунитет и да ја смениме сликата со епидемијата. Во моментов, нагласува министерот, вирусот се шири меѓу невакцинираните.
„Излезе анализата во однос на пациентите и починатите. Евидентно е дека сега вирусот се шири помеѓу невакцинираните. Во таа смисла над 90 проценти од сите починати се невакцинирани и од вкупно дијагностицираните од 6 до 16 септември, близу 30 000 граѓани или 21 процент се вакцинирани, а 79 проценти се невакцинирани. Гледаме и што се случува во околните земји и други земји во Европа и евидентно е дека секаде вирусот се шири и има тешка форма на болеста кај невакцинираните граѓани“,
потенцираше Филипче.
Министерот вели дека засега е рано вакцинацијата да се направи задолжителна, но не исклучува таква мерка наредната година.
„Во однос на задолжителна вакцинација сè уште е рано, не ја исклучувам можноста и сум прилично сигурен дека сите земји во светот во периодот што доаѓа, можеби и следната година, ќе имплементираат такви мерки. Тогаш би имплементирале и ние. Меѓутоа, засега сметам дека овие мерки со апелите и кампањите, граѓаните треба да се свесни дека треба да ги почитуваат и да одговорат на апелите да се вакцинираат. Зошто? Поради тоа што нема никаков притисок во болниците во градовите каде има висок опфат на вакцинација“,
рече Филипче.
За моменталната состојба со вирусот, министерот нагласи дека во моментов неколку денови по ред бројот на дијагностицирани случаи е ист и тешко е да се предвиди како ќе се одвива ситуацијата понатаму.
„Во изминатите неколку денови се бележи едно плато, значи приближно е ист бројот на новодијагностицирани случаи после оние трендови кога секој ден имаше опаѓање од илјада на стотина на ден. Сега навистина е тешко да се каже дали ова плато ќе го имитира платото помеѓу двата претходни брана или после ова ќе има и понатаму пад на случаите“,
рече министерот.
Состојбата во болниците во Скопје, објасни тој, е иста веќе десетина дена и има околу 30-ина слободни кревети.
Нема промени ниту кога се во прашања децата. Како што кажа Филипче, нема зголемување на бројот на хоспитализирани во болницата во Козле, односно тој е ист во последниот еден месец.
„Нема зголемување на бројот на деца кои се хоспитализирани, во болницата во Козле, претходниот период месец-месец и половина беа хоспитализирани 20-тина деца и таа бројка перзистира во целиот овој период. Дали ќе препорачаме нешто во однос на моделот на спроведување на наставата, ќе зависи од анализата која ја спомнав и која ќе биде готова во сабота затоа што сакаме да видиме прво по градови и региони колку од новодијагностицирани се вакцинирани, возрасната група односно дали има деца кои одат во училиште, каква е бројката на новодијагностицирани деца кои одат во училишта. Бројката е навистина мала, но ќе ги анализираме сите овие работи за да видиме дали ќе препорачаме нешто друго во однос на спроведување на наставата“,
рече Филипче.