Од Платформата посочуваат дека во овој момент одговорноста за настанот е клучна и никој не треба да биде изземен од неа, без разлика дали и од која партија е, како и без разлика на верската и етничка припадност и дали е поранешен или актуелен функционер
По трагедијата во Кочани, она што сега треба во најмала рака да се обезбеди е сеопфатна, темелна, непристрасна и натпартиска истрага, велат од Платформата на граѓански организации за борба против корупцијата, од каде што посочуваат дека пожарот во неделата кој однесе 59 човечки животи е само последен во низата случувања кои покажуваат дека корупцијата убива.
„За жал, по случајот кај Ласкарци, случајот со ‘Беса транс’, пожарот во модуларната болница во Тетово, требаше да се случи и пожарот во ‘дискотеката’ во Кочани за одново да се потсетуваме дека повеќедецениската системска корупцијата зема животи“,
се вели во соопштението на Платформата.
Оттаму наведуваат дека будно ги следат постапките во случајот со пожарот во Кочани и бараат истрагата да се води отчетно и транспарентно и за неа да известуваат оние што со закон се надлежни да го прават тоа.
Во таа насока, од Платформата посочуваат дека во овој момент одговорноста за настанот е клучна и никој не треба да биде изземен од неа, без разлика дали и од која партија е, како и без разлика на верската и етничка припадност и дали е поранешен или актуелен функционер.
„Додека не создадеме систем во кој вистинските луѓе со интегритет ќе бидат на вистинските позиции, не треба да се откажеме“,
се вели во соопштението.
Според Платформата, потребни се системски промени кои ќе покажат дека постои реална волја и заложба за бескомпромисна борба со корупцијата од сите чинители, а особено надлежните.
„За жал, праксата константно покажува дека желбата за лично богатење секогаш била над онаа за создавање на систем во кој правилата и процедурите ќе се почитуваат подеднакво од сите, на сите нивоа во општеството“,
додаваат оттаму.
Од Платформата најавуваат дека во текот на идната недела ќе организираат прес-конференција на која ќе ги објават своите конкретни барања што очекуваат да бидат спроведени од надлежните органи кои, како што велат, ќе ги следат во насока на отпочнување на колективна бескомпромисна борба против корупцијата.
Инаку, членки на Платформата на граѓански организации за борба против корупцијата се: Асоцијација за демократски иницијативи, Институт за демократија Социетас цивилис – Скопје, Институт за човекови права, Коалиција Сите за правично судење, Здружение КОНЕКТ – Скопје, Македонски центар за меѓународна соработка, Мост, Метаморфозис, Охрид институт, Транспаренси интернешнал – Македонија, Транспарентност Македонија, Фондација Отворено општество Македонија, Форум ЦСИД, Центар за граѓански комуникации, Центар за истражување и креирање политики, ЕВРОТИНК – Центар за европски стратегии, Хелсиншки комитет за човекови права, SCOOP – Центар за истражувачко новинарство.
Во пожарот кој во неделата рано наутро се случи во т.н. кабаре-клуб во Кочани животите ги загубија 59 лица, а речиси 200 се повредени и се наоѓаат на лекување во здравствените центри во земјава и во странство.
Во во врска со трагедијата досега осомничени се 27 лица за кои, како што утрово соопштија од Јавното обвинителство на Република Северна Македонија, е отворена истрага. За 13 од осомничените, меѓу кои и поранешни владини државни функционери, во рамките на истрагата е одредена мерка притвор.