Камелија Кулакова, мајката на Фросина, рече дека доказите што ги приложи бранителот на обвинетиот не можат и не смеат да влијаат на висината на казната
Адвокатот на Васил Јованов приговараше на доказите што ги изведе обвинителот, а се во насока на одмерување на санкцијата, откако обвинетиот призна вина за сообраќајката во која смртно ја прегази Фросина Кулакова. Адвокатот Сашко Дуковски наведе дека податоците што ги изложил обвинителот се однесуваат на тековни, а не на предмети за кои е завршена судската постапка.
Во корист на својот клиент тој ги наведе неговиот успех во студиите, спортските успеси во бокс, каде што освоил високи награди. Приложи потврди од Ракометната федерација каде што Јованов се натпреварувал за клуб во сезоната на 2021/2022 година. Бранителот ја презентираше и видеоснимката направена непосредно по настанот.
„Се работи за видеозапис со кој одбраната сака да му докаже на овој суд после признавањето вина, однесувањето на Васил Јованов по извршеното кривично дело, неговото искрено каење. Да обрнете внимание на два моменти каде обвинетиот на два пати наведува ‘Леле што направив’ и на крајот на видеото вели ‘Гревота за девојчето’“,
рече адвокатот Дуковски.
Тој рече и дека Јованов се обидел да ја реанимира Кулакова.
Овие докази беа изведени во насока на одмерување на санкцијата. Обвинителот рече дека ја видел снимката и не се сомнева дека е веродостојна. Но, кажа дека судот треба да биде внимателен за нејзината содржина, особено за аудиоделот бидејќи, како што кажа, поради техничката несовршеност, не може да се утврди она што ги кажал бранителот.
„Судот да биде внимателен и на кажаното дека обвинетиот дошол на местото, сакал да ја реанимира”,
рече обвинителот Александар Марковски.
Посочи и дека на видеото не е евидентирано дека тоа било една минута по настанот. На снимката, како што рече, не може да се види дека Јованов се обидува да ја реанимира, туку се гледа трето лице како пристапува до телото.
Дуковски, пак, се осврна на психијатриското вештачење кое, како што кажа, утврдило вина, каење и однос кон делото од страна на Васил Јованов.
Во завршните зборови јавниот обвинител кажа дека останува на обвинителниот акт презентиран на денешното рочиште за кривичното дело тешки дела против животот и имотот во сообраќајот и рече дека бара судот да го огласи виновен и да му одреди казна според законот.
Адвокатот на семејството на Кулакова рече дека се придружува на завршниот збор на Обвинителството и побара да му се одреди највисоката казна која изнесува 20 години затвор. Тој ги повтори околностите како се случил настанот. За презентираното видео рече дека од него се гледа дека првин пристапиле сведоци, а не обвинетиот.
Камелија Кулакова, мајката на Фросина, рече дека доказите кои ги приложи бранителот на обвинетиот не можат и не смеат да влијаат на висината на казната.
„Тие се ирелевантни за тежината на кривичното дело и определување на санкцијата. Каењето кое сака да го истакне бранителот на обвинетиот го порекнува тоа што тој уште следниот ден набавил мобилен телефон во притвор што беше објавено на социјалните мрежи“,
посочи таа.
Таткото побара во рок од три дена во писмена форма да даде завршен збор. Судијката рече дека можност за завршен збор ќе му биде даден на оваа главна расправа, што тој и го стори и побара на Васил Јованов да му биде одредена максимална казна.