Во програмата на Владата, во делот за здравството, планирани се повеќе реформи и активности, со што би се подобриле условите во кои работат здравствените работници, но и би се подобриле услугите што ги добиваат пациентите.
До крајот на годинава, како што меѓу другото се наведува во владината програма за периодот 2020-2024 година, во делот кој се однесува на здравството, ќе биде дефинирана десетгодишната стратегија за издвојување и инвестиции во здравството и ќе биде побарана широка собраниска поддршка за неа бидејќи на здравствениот систем му треба стабилно и повисоко вложување.
Во програмата се наведува дека Владата секоја година ќе ги зголемува платите на здравствените работници и соработници до 10 отсто и целта е најниската плата на здравствените техничари и медицинските сестри да ја стигне просечната плата во државата до 2024 година.
„Ќе распишеме и ќе доделиме дополнителни специјализации во соработка со здравствената фела, имајќи го предвид недостигот на специјалисти во повеќе медицински гранки, ќе обезбедиме платен работен стаж за секој нов млад лекар, но и паричен надоместок како стимулација, сите лекари на специјализација со живеалиште надвор од Скопје кои го немаат решено станбеното прашање ќе добијат субвенција од 12 000 денари месечно“,
се вели во програмата.
Планиран е и стратегиски договор со Универзитетската болница од Франкфурт за едукација на млади лекари и сестри по принцип на ротација. Првпат ќе се воведат стандарди за превенција и следење определени состојби и заболувања, приспособени за примарното ниво на здравствена заштита, со промените во начинот на плаќање ќе се поттикне вложувањето во едукација, во технички и материјални ресурси и ќе се поттикне и активно вклучување на медицинската сестра во реализирање на здравствената грижа.
„Ќе воведеме систем на континуирана едукација за медицински сестри со цел зголемување на нивните компетенции и знаења во соодветната област каде што работат, со целосно здравствено- информатичко поврзување, комплетно ќе се избегне ‘шетањето’ на пациентот поради административни причини на релација матичен лекар – специјалист – матичен доктор – аптека. Владата ќе воведе целосно електронско здравство, без користење хартиени форми на документи“,
се вели во програмата.
Во најава е и нова апликација „Мое здравје“ со која за секој граѓанин ќе се обезбедат електронски поврзани податоци и историјат на дијагнози и терапии.
„Целосно ќе бидат вклучени здруженијата на пациенти во креирање и мониторинг на здравствените политики и на квалитетот на здравствените услуги, со што ќе се зајакне улогата на пациентите во комуникацијата со стручната јавност при донесување прописи и законски решенија од здравствената заштита“,
се вели во програмата.
Ветениот нов Клинички центар се најавува дека ќе почне со изградба во овој мандат на Владата.