Основното јавно обвинителство во Кавадарци денеска поднесе предлози за казнен налог за седум лица, сите од од овој град, кои во одделни случаи сториле кривично дело „непостапување според здравствени прописи за време на епидемија“.
Како што се наведува во соопштението од Обвинителството, за време на пандемија, епидемија од глобални размери, определена со одлука на генералниот секретар на Светската здравствена организација на 11.03.2020 година, обвинетите не постапиле според писмена наредба на Министерството за здравство со која се определуваат мерки за нејзино сузбивање или спречување.
„Со одлуката е определено спроведување на задолжителна самоизолација за секој државјанин на Северна Македонија кој влегува во државата на граничните премини, а патува од високо ризични или средно ризични земји, утврдени со листата на Светската здравствена организација . Сите обвинети, кои дошле од различни држави, при влез во земјава на 16 март 2020 година, потпишале изјави за самоизолација. Но при проверка од полициските службеници не биле затекнати во нивните домови во кои требало задолжително да ја спроведуваат мерката“,
се наведува во соопштението.
За сите обвинети, како што се посочува, јавен обвинител доставил до Основниот суд – Кавадарци предлози за парична казна во висина од 50 дневни глоби.