И понатаму активен е пожарот кај селата Брезница и Тажево, каде што гори квалитетна борова шума, а во борбата со огнот ангажирани се 15 вработени од „Јасен“, на кои им помагаат триесетина припадници на Армијата, како и неколкумина вработени во Јавното претпријатие „Национални шуми“
Од вкупно 29 пожари на отворен простор во последното деноноќие, седум се сè уште активни и тимовите на терен прават напори за нивно ставање под контрола, информираа утрово од Центарот за управување со кризи (ЦУК).
Според Центарот, активни се пожарите кај селата Селце и Пухче на територијата на општина Штип, во реонот на Армискиот воен полигон, високо над Криволак кон Пенуш. Овде, како што велат од ЦУК, има многу голема „фронтова“ линија на пожарот во кој е зафатена и гори ниска вегетација – смреки, трња, грмушки и нискостеблеста шума, претежно даб.
И понатаму е активен пожарот кај селата Брезница и Тажево, каде што гори квалитетна борова шума, а во борбата со огнот ангажирани се 15 вработени од „Јасен“, на кои им помагаат триесетина припадници на Армијата, како и неколумина вработени во Јавното претпријатие „Национални шуми“.
Нивните напори, велат од ЦУК, се фокусирани на линијата кај реката-понорница Оча, пред Борова Брезница, да се спречи огнот да не се пробие кон внатрешноста на заштитеното повеќенаменско подрачје „Јасен“ кое е од посебно значење за државата.
Вчера, според соопштението на Центарот за управување со кризи, армиски хеликоптер од типот „ми-17“ и покрај двата обиди, не можел да дејствува поради многу густиот чад и други небезбедни услови за дејство.
Останатите четири активни пожари се на територијата на општината Чашка, кај селата Габровник, Мокрени и кај месноста Мукос, додека во општина Долнени пожари има кај селата Небрегово и Гостиражни, каде што е префрлен пожар од селото Богомила во општина Чашка.
Од ЦУК информираат дека под контрола се ставени седум пожари и се настојува да се доведат во фаза на локализирање, а потоа и да се изгаснат.
Станува збор за пожарите кај селата Фариш и Ораовец во општина Кавадарци, селото Калањево – општина Неготино, потоа два на територијата на општината Македонски Брод, еден на територијата на општина Пробиштип, еден кај селото Бадилен во општина Ново Село и еден во општина Чашка на планината Голешница на врвот Лисец.
Покрај овие пожари, надлежните во последното деноноќие интервенирале и изгаснале 15 пожари во населени места.