Хуманитарни работници кои даваат помош на десниот брег на реката Днепар, кој е под украинска контрола, пак, велат дека се принудени да работат под артилериски оган од руска страна, јавува Ројтерс
Најмалку седум лица се водат како исчезнати откако водите од уништената брана „Нова Каховка“ на реката Днепар ги поплавија околните области, јави денеска руската новинска агенција ТАСС цитирајќи го градоначалникот на градот Нова Каховка, инсталиран од Москва, пренесува „Гардијан“.
„Со сигурност знаеме за седум луѓе (дека се исчезнати)“,
изјавил градоначалникот Владимир Леонтиев за ТАСС.
Повеќе од 900 луѓе вчера биле евакуирани од градот Нова Каховка, кој брои околу 45 000 жители. Градот се наоѓа на левиот брег на реката Днепар и е под контрола на Русија.
Претставници на украинските власти претходно соопштија дека повеќе од 40 000 луѓе се под ризик од поплави, а се очекува водениот бран да го достигне својот врв денеска.
Шефот на канцеларијата за помош на Обединетите нации Мартин Грифитс во своето обраќање пред Советот за безбедност на ОН рече дека магнитудата на големата катастрофа целосно ќе биде позната во наредните денови, пренесува „Гардијан“.
Новинската агенција Ројтерс јави дека хуманитарни работници на десниот брег на реката, кој е под украинска контрола, пријавиле дека се принудени да работат под артилериски оган од руската страна.
„Најголемата тешкотија во моментов не е водата. Русите од другата страна на реката сега нè гранатираат со артилерија“,
изјавил рече Ендрју Негрич, кој ги координира активностите за помош на американска добротворна организација „Глобална мисија за зајакнување“
Вчеравечер во Херсон репортерите на Ројтерс слушнале четири артилериски експлозии во близина на станбена населба од каде што биле евакуирани цивили.
Украински официјални претставници и новинари на социјалните мрежи споделуваат видеоснимка која, како што се наведува, го прикажува поплавениот град Олешки на левиот брег на реката Днепар, во областа Херсон која е под руска окупација.
Video showing the flooding and devastation in Russian-occupied Oleshky, Kherson oblast, a day after the Kakhovka Dam under Russian forces’ control was destroyed. pic.twitter.com/k6ys9rnjij
— Christopher Miller (@ChristopherJM) June 7, 2023
Браната „Нова Каховка“ е клучна за регионот на Херсон бидејќи обезбедува вода за земјоделците и жителите, како и за нуклеарната централа „Запорожје“. Таа претставува и витален канал кој носи чиста вода на југ до полуостровот Крим, кој во 2014 година беше анектиран и е под контрола на Русија.
Украинскиот администратор на државните хидроцентрали „Укрхидроенерго“ предупреди дека врвот на излевање на водата од резервоарот што се празни се очекува денеска. По ова, како што се наведува, се очекува период на стабилизација и повлекување на водата во наредните четири до пет дена.
Постои загриженост за нуклеарната централа „Запорожје“ – најголемата во Европа – која користи вода за ладење на реакторите од браната.
Според Меѓународната агенција за атомска енергија (МААЕ), таму ситуацијата во моментов и под контрола и нема непосреден ризик за нуклеарната безбедност на централата.
Јужната команда на украинските сили вчера утро соопшти дека руските сили ја урнале браната „Нова Каховка“ во окупираниот дел на украинската област Херсон. Уништувањето на браната доведе до излевање на водата до 11 метри во областа Нова Каховка и принуди евакуација на речиси илјадници луѓе.
Додека претставници на официјален Киев, но и на САД, Канада и на Европската Унија го осудија уништувањето на браната, а дел од нив за тоа ја обвинија Русија, официјална Москва, пак, обвини дека станува збор за намерна саботажа извршена од Украина за да се одвлече вниманието од неуспешната контраофанзива против руските сили.
Засега не може со сигурност да се потврди што точно се случило и кој стои зад уништувањето на браната. Ова вчера го кажа и портпаролот на Советот за национална безбедност на Белата куќа Џон Кирби, кој рече дека Вашингтон со внимание ги разгледува извештаите за тоа што го предизвикало уривањето на браната.