Наводите за руско влијание во црквата го поткрепува со посетите на вториот човек на Руската православна црква (РПЦ), митрополитот Антониј, кој воедно е министер за надворешни работи на РПЦ на нашата црква, но и со честитките кои тој му ги упатил за именденот на архиепископот на МПЦ-ОА, г.г. Стефан
Година и пол сè стои во место во МПЦ и никој во МПЦ-ОА нема интерес да го продолжи патот до Цариград, што значи дека притисокот од Руската црква е голем. Вселенската патријаршија е проевропски, односно прозападно ориентирана, смета новинарот
Во Македонската православна црква-Охридска Архиепископија (МПЦ-ОА) се случува сериозно руско влијание и тоа оди по линија на еден или двајца владици во Синодот, изјави новинарот Марјан Николовски, главен и одговорен уредник и основач на Религија.мк, во гостување на поткастот „Политиканти“ на „Слободен печат“, одговарајќи на прашање за обидите на црковните власти да го замолчат критичкото новинарство преку црковно-судски постапки.
Николовски изминатата недела е актуелен во јавноста откако Синодот на Македонската православна црква-Охридска Архиепископија (МПЦ-ОА) му достави писмо во кое го повика да се појави на црковен суд и да биде сослушан за неговите новинарски написи во порталот Религија.мк.
„Искуството низ годините покажа дека верските прашања можат да бидат многу сензитивни. Затоа сметам дека пишувањето и објавувањето информации за тоа какви се состојбите во МПЦ-ОА и Исламската верска заедница (ИВЗ) е корисно за општеството. Јас тоа го работам низ призма на новинарскиот аспект. Така функционира Религија.мк. Тоа не е верски портал. Се создаде фама дека владиците и нивното општество се доведени во опасност поради моите пишувања. Ниту сум јас толку моќен ниту, пак, тие толку ми се плашат. Идејата е друга, тоа да помине кај мене, за да можат утре тие двајца владици по налог на Москва да се пресметуваат со други свештеници или кој било друг кој не сака МПЦ да се претвори во руски инструмент“,
изјави Николовски.
Наводите за руско влијание во црквата го поткрепува со посетите на вториот човек на Руската православна црква (РПЦ), митрополитот Антониј, кој воедно е министер за надворешни работи на РПЦ на нашата црква, но и со честитките кои тој му ги упатил за именденот на архиепископот на МПЦ-ОА, г.г. Стефан.
„Рускиот патријарх Кирил пред некое време од литургиите го исфрли делот каде што православната црква се моли за мир во светот. Тој декрет на рускиот патријарх е изваден од литургиите и секој руски свештеник ако се моли за мир е санкциониран во Русија. Парадоксот и паранојата на Руската православна црква оди дотаму. Во Македонската православна црква се случува сериозно руско влијание и тоа оди по линија на еден или двајца владици, од кои во моментот едниот е обвинител, а другиот ќе биде судија“,
потенцираше Николовски.
Според него, РПЦ сака да создаде нов блок во православниот свет и рускиот патријарх да биде новиот папа на православието.
„Најдете ја првата прес-конференција на Путин после првиот напад на Украина, каде што вели дека негова одговорност е да ги штити православните држави во светот. Во неколку држави има православни цркви во светот. Голем дел се членки на НАТО, меѓу кои и ние. Ако ја тргнеме Руската црква, Грција е доминантно православна држава и членка на ЕУ и НАТО. Албанија има православна црква, членка на НАТО и е на пат кон ЕУ. Бугарија е членка на НАТО и на ЕУ. Романија е членка на НАТО и ЕУ“,
рече новинарот.
Николовски вели дека и покрај тоа што МПЦ-ОА е на пат кон признавање на нејзината автокефалност се прави обид да се прикаже дека тоа признавање е во линија на руската добра волја.
„Се прави обид да се внесе МПЦ-ОА во целиот тој блок на руско влијание за утре, за што било и да се случува во општеството, Македонската црква да спроведува одлуки на Руската црква“,
вели Николовски.
Во моментот, според Николовски, притисокот е врз МПЦ-ОА од страна на Руската црква да се откаже од добивањето на томосот од Вселенската патријаршија.
„Година и пол сè стои во место во МПЦ и никој во МПЦ-ОА нема интерес да го продолжи патот до Цариград, што значи дека притисокот од Руската црква е голем. Вселенската патријаршија е проевроски, односно прозападно ориентирана. Најголем дел од своите верници ги има Америка, во Европа. Руската православна црква отсекогаш имала обид да создаде начин на функционирање на она што бил Цариград во времето на Византија. Ние сме на средината. По налог на Русија, Србите да издадат томос кој нема никаква важност за ниедна црква“,
рече новинарот и уредник на Религија.мк.
Здружението на новинарите на Македонија (ЗНМ) преку соопштение изрази поддршка за напорите на новинарот Марјан Николовски, главен и одговорен уредник и основач на Религија.мк, „во критичкото известување за религиозни прашања во полза на јавниот интерес“.
Оттаму, како што велат, остро ги осудуваат сите обиди на црковните власти внимателно да го испитаат и замолчат критичкото новинарство и слободата на изразување. Ваквите активности, додаваат од ЗНМ, не само што ги поткопуваат основните принципи на независноста на медиумите, туку ги загрозуваат и демократските вредности кои овозможуваат да напредува разновидното и плуралистичко општество.
Вицепремиерот за политички систем и односи меѓу заедниците Артан Груби пред една недела рече дека има руско влијание во нашите верски заедници.
Американската амбасадорка во земјава Анџела Агелер веќе изјави дека постои руско влијание во земјава вчерашното интервју на ТВ 24 на прашање како САД ќе помогне за руското влијание во пресрет на изборите, Агелер рече дека претпоставува дека постои руско влијание во земјава, како и дека го има во целиот регион.