На состанокот на РКЕ со Здружението на инженери биле прифатени забелешките дека фактурирањето врз основа на проценета потрошувачка на електрична енергија доведува до разлики во износите, а за надминување на оваа состојба било предложено решение кое предвидува издавање коригирана фактура што ќе ги опфаќа деновите од претходното до последното отчитување на броилото
Месечно отчитување на броила, како и вонредна проверка на броилатс по случаен избор кај дел од потрошувачите кои имаат доставено приговори до Регулаторната комисија за енергетика (РКЕ) се дел од мерките на кои од Комисијата велат дека работат подолг период.
Оттаму додаваат дека овие механизми се со цел зајакнување на довербата и надминување на дилемите кај потрошувачите кои се сомневаат во исправноста на броилата, а во дејствувањето се вклучени и од ресорното Министерство за енергетика, рударство и минерални суровини.
„РКЕ останува отворена и транспарента како и досега за предлози и идеи од граѓаните, но и експертската јавност без разлика дали се организирани формално или неформално. Овој сет на мерки ќе стапи во сила по завршување на сеопфатната експертска консултативна фаза, по што јавноста ќе биде детално запознаена со решенијата“,
велат од РКЕ за МИА.
Во просториите на РКЕ денеска се одржа состанок со претставници на Здружението на инженери на Република Македонија, на кој тие ги изнесле своите ставови за фактурирањето на електричната енергија.
На состанокот, како што информираат од Здружението, биле прифатени забелешките дека фактурирањето врз основа на проценета потрошувачка на електрична енергија доведува до разлики во износите, што може да предизвика финансиска штета за потрошувачите, додека во исто време создава дополнителни приходи за операторот на дистрибутивниот систем.
За надминување на оваа состојба, од Здружението велат дека предложиле решение кое предвидува издавање коригирана фактура што ќе ги опфаќа деновите од претходното до последното отчитување на броилото.
„Со ова ќе се овозможи реална и прецизна наплата на електричната енергија, елиминирајќи ја можноста за неправедно внесување на потрошувачите во повисоки тарифни блокови поради корекции во месеците кога се врши реалното отчитување“,
велат од Здружението на инженери.
Според нив, конечниот текст за измените во Правилата за снабдување со електрична енергија ќе биде утврден на подготвителна седница, на која, како што велат, ќе бидат присутни и од нивното Здружение.
Од Регулаторната комисија за енергетика минатиот месец рекоа дека сите домаќинства што добиле сметки за струја и имаат првпат фактурирана потрошувачка во четвртиот блок, „ЕВН хоум“ е должен да ги коригира сметките за електрична енергија.
Од РКЕ велат дека „ЕВН хоум“ треба да направи соодветна распределба по блокови согласно историјатот на просечната потрошувачка на домаќинството во последните три предсметковни периоди.
Потрошувачите, додаваат од РКЕ, што се незадоволни од пресметката на потрошената енергија и износот на сметката, можат да поднесат приговор до универзалниот снабдувач „ЕВН хоум“.
Доколку потрошувачот не е задоволен од добиениот одговор или не добие одговор во законски предвидениот рок од осум дена, од РКЕ велат дека приговор може да се поднесе и до нив како второстепен орган.
За приговорот што се поднесува до РКЕ нема пропишано посебна форма или формулар и кон него треба да приложат копија од вложениот приговор до „ЕВН хоум“, одговорот што го добиле оттаму и копија од сметката по која приговараат.
Приговорот може да се достави во архивата на РКЕ или електронски на мејлот: [email protected] и [email protected] .