„Се надевам дека нема да има дополнителни компликации во здравјето на тие што ја преживеаја оваа трагична ситуација“, рече Таравари
Директорот на Фондот за здравствено осигурување Сашо Клековски вели дека конзилиум работи на целиот список повредени во пожарот во дискотеката во Кочани и оти се прави процена дали некои треба да бидат префрлени од Кочани и Штип во Скопје, како и од Скопје на друго место.
Клековски информира дека ќе дојдат и странски експерти за изгореници, меѓу кои и од Израел, а имале понуди за помош и од центри за изгореници од Холандија, Италија и Белгија.
„Бидејќи станува збор за опекотини што може да се комплицираат, наредните денови конзилиумот на доктори сметаше дека е добро да се направи место во Скопје за сите пациенти, а најкритичните да се испратат во странство. Тоа што прво тргна оттука од Клинички центар, се три пациенти за болницата ‘Папаниколау“ во Солун. Голема благодарност и на дипломатите и на лекарите кои овозможија без транспорт“,
рече Клековски.
Тој додаде дека веќе пристигнал и авионот од Бугарија и оти за таму имало осум пациенти од кои пет биле покритични и три помалку критични. Со две српски возила за брза помош, кои биле дојдени во болницата „Свети Наум Охридски“, ќе биле пренесени пациенти во Ниш. Од Белград требало да пристигнат три возила и авион од Турција, за исто така да пренесат пациенти.
Како што кажа Клековски, на сопствено барање од пациентите, во „Систина“ имало еден пациент, а во „Жан Митрев“ три. Додаде и дека двете болници ги дале петте возила со интензивна нега на располагање, за транспорт на пациентите.
Министерот за здравство Арбен Таравари истакна дека повредените пациенти се згрижени, во стабилна и релативно добра состојба, надвор од животна опасност, на Хируршки клиники во моментов имало 25 пациенти, по 24 во Градска хирургија и болницата „8 Септември“, 31 во Штип и 13 во Кочани, или вкупно 117 пациенти. Во меѓувреме, 13 пациенти биле испратени надвор од државата на лекување, за евентуално да нема компликации во тие случаи.
Таравари јавно се заблагодари на повеќето министри за здравство од регионот и подалеку, Албанија, Србија, Косово, Црна Гора, Унгарија, Турција и други. Неколку од пациентите ќе биле лекувани во Грција, Бугарија, Турција, Србија.
„Се надевам дека нема да има дополнителни компликации во здравјето на тие што ја преживеаја оваа трагична ситуација“,
нагласи Таравари.
На новинарско прашање, тој појасни дека критични биле околу 20 пациенти.
„Може да се каже дека бројката е сега малку поголема. Се потрудивме да ги однесеме, откако ни се понудија во здравствени установи во Солун, Белград, Турција, Софија. Досега се испратени 13. Другите остануваат тука. Се заблагодарувам на целиот медицински персонал за солидарноста“,
рече министерот.
Таравари рече дека будно се следи состојбата и навремено и соодветно се реагирало, здравствени работници и лекови имало доволно. Реално, не очекувале дополнителни компликации. Околу четири лица се лекувале во приватни установи, на сопствено барање.
Министерот потврди дека и до него имало прашања од семејствата на згрижените пациенти, кои сè уште не знаеле што се случило со нивни блиски.