Се прегледуваат камери, се вршат разговори со блиските на исчезнатото 14-годишно девојче, МВР апелира да не се шират дезинформации

Од МВР велат дека истрагата продолжува интензивно и во текот на ноќта

Според објавата на мајката на девојчето, 14-годишничката тргнала од дома накај училиште во 7:20 часот, по што ѝ се губи секаква трага. Последен пат била видена во Дебар Маало на пат кон училиштето „Јохан Хајнрих Песталоци“

Министерството за внатрешни работи (МВР) доцна вечерва соопшти дека се преземаат интензивни мерки и активности за пронаоѓање на В. Ѓ. (14), откако денеска (27.11.2023) во 08.35 часот З. Ѓ. од Скопје пријави дека се сомнева дека нејзината ќерка В. Ѓ. (14) е исчезната.

„За решавање на случајот и пронаоѓање на лицето веднаш по добиената пријава вклучени се целосните капацитети на СВР Скопје на највисоко ниво, извршени се низа разговори со лица блиски на малолетничката, прегледани камери итн.“,

соопштуваат од МВР.

Полицијата трага по 14-годишно девојче во Скопје чија трага се изгубила на пат накај училиште

Оттаму велат дека истрагата продолжува интензивно и во текот на ноќта.

МВР апелира да не се шират дезинформации.

„Постојано ќе ја информираме јавноста сѐ до пронаоѓање на малолетничката“,

додадоа од МВР.

Според објавата на мајката на девојчето, 14-годишничката тргнала од дома накај училиште во 7:20 часот, по што ѝ се губи секаква трага. Последен пат била видена во Дебар Маало на пат кон училиштето „Јохан Хајнрих Песталоци“.

„Утрово во 7:20 часот мојата ќерка Вања Ѓорчевска излезе за на училиште и се изгуби секаква трага. Облечена е во црни панталони со странични џебови, светлосин џемпер, црна кратка зимска јакна и бели патики ’најк’ со кафеава лента на ѓонот. Последен пат е видена во Дебар Маало на пат кон ‘Песталоци’. Доколку имате каква било информација, јавете се на 075 400 816“,

пишува мајката на девојчето во објава на Фејсбук.