Покрај реформите кои ги предвидува новата четиригодишна програма за работа на Владата, ќе се изготвува и Национална стратегија за дигитализација на образовниот систем.
Ова го најави министерката за образование, Мила Царовска, на денешната онлајн дебата за дигитализација на образовниот систем на која учество зеде и претседателот на државата, Стево Пендаровски.
„Можеби процесот на дигитализација кај нас е започнат, но треба да се интензивира. Затоа што времето брзо истекува и доколку не го фатиме чекорот со овој глобален процес, тогаш многу ќе заостанеме во трката по квалитетно образование за нашите сегашни и идни генерации ученици“,
рече Царовска.
Таа додаде дека нејзина основна цел во мандатот кој го доби како министерка за образование е да изгради современ и конкурентен образовен систем на среден рок, кој ќе биде флексибилен и лесно прилагодлив на секоја нова промена со која се соочува општество или воопшто светот. Царовска рече дека креирање на единствена национална платформа за учење на далечина е неопходно.
„Можам да кажам дека веќе ја имаме првичната драфт верзија на оваа платформа, која можеби со мали дополнувања и минимални корекции врз база на сугестии од крајните корисници, ќе стане конечна и применлива до пред почетокот на учебната година. Јас веќе ја разгледав, лично ми се допаѓа и сметам дека ќе биде лесна за употреба и ќе ги задоволи очекувањата и потребите на сите кои ќе треба да бидат поврзани со истата, првенствено на учениците и наставниците“,
додаде таа.
Со издавачките куќи и авторите на учебниците, Царовска најави дека ќе се одвива дијалог со цел поголема застапеност на учебниците во електронска форма.