Како што претходно објавија британските медиуми, канцеларијата на британскиот комесар за информации ги испитува тврдењата дека персоналот на приватната лондонска клиника, чии услуги ги користат членовите на кралското семејство и каде што во јануари годинава беше оперирана принцезата Мидлтон, се обидел да пристапи до нејзините приватни медицински досиеја
Се огласи директорот на лондонската клиника каде што беше оперирана принцезата од Велс Кејт Мидлтон, по информациите дека луѓе од персоналот се обиделе да ги видат медицинските досиеја на Мидлтон. Шефовите започнале истрага за тврдењата дека доверливоста била нарушена додека Кејт била пациент во нивната болница.
Директорот Ал Расел изјавил дека ќе бидат преземени сите неопходни чекори во истрагата, пишува „Дејли мејл“.
„Секој во лондонската клиника е акутно свесен за нашите лични, професионални, етички и законски должности во однос на доверливоста на пациентите. Ние сме исклучително горди на извонредната грижа и дискреција што се стремиме да им ја пружиме на сите наши пациенти кои ни ја даваат својата доверба секој ден. Во случај на какво било прекршување на системот, ќе бидат преземени сите соодветни истражни, регулаторни и дисциплински чекори. Во нашата болница нема место за оние што намерно ја изневеруваат довербата на нашите пациенти или колеги“,
изјавил тој.
Како што претходно објавија британските медиуми, канцеларијата на британскиот комесар за информации ги испитува тврдењата дека персоналот на приватната лондонска клиника, чии услуги ги користат членовите на кралското семејство и каде што во јануари годинава беше оперирана принцезата Мидлтон, се обидел да пристапи до нејзините приватни медицински досиеја.
Британскиот весник „Дејли мирор“, кој го цитира Би-би-си, јави дека најмалку еден член на болничкиот персонал бил фатен при обидот да пристапи до приватните медицински досиеја на Кејт Мидлтон.
Принцезата од Велс, Кејт Мидлтон, во јануари годинава беше хоспитализирана по направена операција на абдоменот, по што се повлече од јавните обврски додека закрепнува.
Изминатиот период во светските медиуми се појавија шпекулации за здравјето на Кејт, а сомнежите се зголемија зашто таа отсуствуваше од јавните должности. Потоа шпекулациите се интензивираа и се насочија кон бракот меѓу Кејт и Вилијам.