Премиерот Христијан Мицкоски вчера оцени оти е пракса амбасадорите да се мешаат во внатрешните работи на државата и притоа, како што рече, во овој случај да го занемарат гласот на 600 илјади граѓани кои ја избрале оваа коалиција и нејзината програма во која, меѓу другото, се предвидува распуштање на Судскиот совет и Советот на јавни обвинители
Се надеваме на продолжување на дијалогот со Владата – порачаа евроамбасадорот Дејвид Гир и германската амбасадорка Петра Дрекслер прашани да го коментираат ставот на премиерот Христијан Мицкоски оти амбасадорите премногу се мешаат во внатрешните работи на државата. Коментарот на Мицкоски се однесуваше на изјавите на дел од амбасадорите оти се против распуштање на Судскиот совет и Советот на јавни обвинители.
Во однос на изјавата на Мицкоски, евроамбасадорот Дејвид Гир во изјава за медиумите рече оти премиерот покренал важни прашања во однос на потребата од реформи во владеењето на правото.
„Ова е од суштинско значење за европскиот пат на земјата, и ние ќе продолжиме да се ангажираме со премиерот и со Владата за да ги разгледаме најдобрите начини за да се оди напред. Се надеваме на конструктивен дијалог, делиме исти цели, за да ја донесеме земјата во ЕУ колку што е можно побрзо“,
рече Гир одговарајќи на новинарски прашања по НАТО-работниот појадок организиран од министерот Тимчо Муцунски.
Сличен коментар во однос на вчерашната изјава на премиерот даде и германската амбасадорка Петра Дрекслер.
„Ќе го продолжиме дијалогот со новата влада и верувам дека тоа ќе се вреднува од двете страни. Имаме размена на прашања во областа на владеењето на правото, што е дел од процесот за пристапување во ЕУ, кластерот ‘Темели’ е многу важен и се надеваме дека ќе го продолжиме дијалогот со Владата“,
порача Дрекслер.
Премиерот Христијан Мицкоски вчера оцени оти е пракса амбасадорите да се мешаат во внатрешните работи на државата и притоа, како што рече, во овој случај да го занемарат гласот на 600 илјади граѓани кои ја избрале оваа коалиција и нејзината програма во која, меѓу другото, се предвидува распуштање на Судскиот совет и Советот на јавни обвинители. Ги повика амбасадорите ако имаат, да предложат подобро решение во врска со овие две тела.