Од Општина Гостивар соопштија дека градоначалникот Таравари денеска го посетил училиштето откако видел дека случајот покрена низа реакции во јавноста. Во училиштето, рече тој, отишол за да ги слушне сите страни и се запознал дека проблемот започнал во декември кога родители покренале петиција
Се надевам дека случајот со мојата ќерка ќе биде последен, вели Илир Адеми, татко на 11-годишната Ембла од Гостивар откако родители од основното училиште „Единство“ покренаа петиција девојчето кое е со Даунов синдром да не учи во исто одделение со нивните деца поради агресивност.
Изјавата на таткото на Ембла ја пренесуваат од Општина Гостивар, по неговата средба со градоначалникот Арбен Таравари.
„Го поздравувам градоначалникот кој беше посветен на случајот и му благодарам што се заложи за решавање на овој проблем, се надевам дека овој случај ќе се реши и ќе биде последен со овие деца и не само за мојата ќерка, туку за сите“,
вели Адеми.
Од Општината соопштија дека Таравари денеска го посетил училиштето откако видел дека случајот покрена низа реакции во јавноста.
„Дојдов да се запознаам со проблемот, бидејќи вчера на социјалните мрежи ја видов загриженоста искажана од голем број луѓе и мислам дека секоја неволја има добра страна, и тука мислам дека е добро што населението се сензибилизира во овој поглед. Како општинска администрација мислам дека овие 4-5 години работевме посветено на овие деца и мислам дека се разликуваме од многу други општини и во однос на изградбата на објект за деца со посебни потреби и центарот за аутизам“,
рече Таравари.
Во училиштето, рече градоначалникот, отишол за да ги слушне сите страни и се запознал дека проблемот започнал во декември кога родители покренале петиција. Како општина, рече тој, иако немаат обврска досега обезбедиле лична асистентка за Ембла, како и дефектолог кој работи со девојчето во моменти кога се појавува некоја вознемиреност кај неа.
Малата Ембла поради бојкот на родители на останатите деца вчера не го започна второто полугодие. За случајот реагираше и министерот за образование Јетон Шаќири кои утрово соопшти дека девојчето денеска повторно седнало во ученичките клупи.
Покрај во јавноста, оваа приказна предизвика реакции и од Хелсиншкиот комитет за заштита на човековите права, а за него ќе постапуваат и Народниот правобранител и Комисијата за заштита од дискриминација.