Антидискриминациска отвори постапка по службена должност за сегрегација на ученичката Ембла

Комисијата в понеделник ќе изврши увид во училиштето, а веќе се остварени контакти со градоначалникот Таравари и директорот на училиштето

Комисијата за спречување и заштита од дискриминација (КСЗД) отвори постапка по службена должност за сегрегација на четвртоодделенката Ембла од Гостивар. Таа не го почна второто полугодие во нејзиното одделение во ОУ „Башкими“ поради бојкот на родителите на учениците од паралелката бидејќи таа има Даунов синдром.

„Постапката е започната по службена должност, по информациите кои се раширија на социјалните мрежи дека единаесетгодишната Ембла останала сама во училишните клупи бидејќи другите ученици ја бојкотирале наставата откако нивните родители испратија петиција во која наведуваат дека одлуката да не ги пуштаат своите деца на настава. Комисијата в понеделник ќе изврши увид во училиштето, а веќе се остварени контакти со градоначалникот Таравари и директорот на училиштето. За исходот од постапката, јавноста ќе биде навремено и транспарентно информирана“,

соопштија од КСЗД.

Родителите на другите ученици покренале петиција во која напишале дека одлуката да не ги пуштаат своите деца на настава ја донеле „поради попречување на наставата од страна на ученичката Ембла Адеми и поради агресивност“.

Малата Ембла се врати во училиште, но до кога ќе биеме битки против предрасудите?

Случајот го испитува и Народниот правобранител.

Се надевам случајот со мојата ќерка ќе биде и последен, вели таткото на малата Ембла