На 14 јули Владата ја усвои нацрт-верзијата со придружните елементи на реформската агенда и таа е испратена до Европската комисија на внатрешна консултација. До 31 јули треба да добиеме повратни коментари за да може после Владата врз основа на тие коментари да ја усвои крајната верзија на реформската агенда, кажа Муртезани
Да ги почекаме забелешките од Европската комисија до крајот на месецот, па ќе споделиме детали од документот пратен во Брисел, порача министерот за европски прашања Орхан Муртезани, прашан за содржината на реформската агенда, односно дали во нацрт-верзијата е ставено распуштањето на Судскиот совет и Советот на јавни обвинители, предлог на Владата, кој наиде на критики од меѓународната заедница.
„Не дека не знам, но не сакам да споделувам информации за кои не сум овластен да ги споделам. Тие се информации од надлежните министерства и затоа не можам да ги споделам. Кога ќе добиеме официјален одговор од ЕК, секако дека ќе ги споделам“,
вели Муртезани.
Според Муртезани, првиот дел од средствата кои ЕУ ги намени со Планот за раст на земјите од Западен Балкан се очекува да бидат префрлени во втората половина од септември, по завршување на процедурите.
„На 14 јули Владата ја усвои нацрт-верзијата со придружните документи на реформската агенда и таа е испратена на внатрешна консултација. До 31 јули треба да добиеме повратни коментари, за да може после Владата да ја усвои крајната верзија на реформската агенда. После усвојувањето, следува потпишување на договор за инструмент за реформи и раст и договорот за заем и ратификација во Собранието. Се надеваме дека вториот дел на септември треба да стигне првата транша“,
објасни Муртезани.
Во април и мај годинава Европскиот парламент и Советот на ЕУ се согласија – земјите од Западен Балкан да добијат 6 милијарди евра од Брисел. За Северна Македонија се наменети 750 милиони евра, а првата транша ќе изнесува седум проценти, односно 52,5 милиони евра.
Целта на Планот за раст е преку засилена економска интеграција на земјите од регионот меѓу себе и со ЕУ, постепено да почне да се намалува разликата во стандардот на државите од Западен Балкан и Унијата.
За да се случи таа интеграција, потребни се реформи што секоја земја прво ги договара со Брисел, со конкретни рокови и задолженија, додека нивното спроведување ќе се поттикнува со финансиски средства.
Во контекст на средствата од ЕУ, Муртезани посочи и дека неопходно е да се зајакне кадарот за ИПА-структура во институциите бидејќи, како што рече, парите од Планот за раст може да бидат доведени во прашање.
„Во последна фаза на усвојување сме од реформската агенда со која ќе добиеме пристап до дополнителни 750 милиони евра финансиски средства. Мојата досегашна перцепција е дека ако не ја зајакнеме ИПА-структурата со професионален кадар, само ќе добиеме пристап до тие средства, но нема да можеме да ги апсорбираме сите“,
кажа Муртезани.