Владејачката партија влезе во одбрана на актуелниот скопски градоначалник и кандидат за втор мандат
Во ВМРО-ДПМНЕ, исплашени од извесниот пораз на претстојните локални избори во градот Скопје, не престануваат да измислуваат и да конструираат непостоечки скандали за градоначалникот Петре Шилегов реагираа денеска од СДСМ откако опозицијата го нападна нивниот кандидат за втор мандат за скопски градоначалник дека местел тендери во периодот 2019 досега.
„Од белата палата, можат да објавуваат нецелосни документи, неосновано да обвинуваат за наводна корупција и злоупотреби, но ништо нема да ги спаси од пораз на изборите, седми по ред. Со ваквите настапи, ВМРО-ДПМНЕ само потврдува дека нема никаква идеја, никаков предлог за подобрување на животот на скопјани, за модернизација на главниот град. Од друга страна, граѓаните гледаат дека понудата на ВМРО-ДПМНЕ за овие избори е понуда на кадри на Груевски и лица осомничени и осудени за сторени кривични дела. Затоа на ВМРО-ДПМНЕ не им останува ништо друго, освен со лаги, шпекулации и конструкции да се обидат да си го ублажат новиот убедлив пораз на изборите“,
реагираат од СДСМ откако ВМРО-ДПМНЕ денеска ја отвори аферата што ја нарече „Профитер“ и најави серија прес-конференции под тој наслов во наредните денови, кога и почнува изборната кампања.
Градоначалникот и кандидат и на овие избори досега не се огласи во врска со опозициските обвинувања дека ја оштетил градската каса, а тој профитирал, односно за четири години, како што беше наведено, го зголемил својот имот за речиси половина милион евра.