Од опозициската партија оценуваат оти препирките на владините коалициски партнери преку медиумите ја потврдуваат нивната неспособност и нефункционалност на Владата
Снопче и Мицкоски, заедно со Таравари, треба да седнат и да работат нешто за граѓаните, а не да се расправаат, реагираат утринава од опозицискиот СДСМ по последните изјави на пратеникот Халил Снопче и премиерот Христијан Мицкоски во врска со законот за бранители.
Пратеникот Халил Снопче завчера во телевизиско гостување изјави дека доколку се укине Законот за употреба на јазиците, но и ако се изгласа законот за бранителите, коалицијата „Вреди“ ќе ја напушти Владата. Премиерот Христијан Мицкоски, пак, на ова прокоментира: „Нека му е со среќа“.
Од СДСМ оценуваат оти препирките на владините коалициски партнери преку медиумите ја потврдуваат нивната неспособност и нефункционалност на Владата.
„Владата функционира само кога треба да се договорат како да ја партизираат државата и делат привилегии, за сè друго е целосно нефункционална. Воопшто не е важно дали конфликтот е реален или не, тој на крајот резултира со слаба Влада која ги злоупотребува чувствата на граѓаните. Овие конфликти внатре во Владата и постојани јавни препукување не се непознати, тоа го правеа ВМРО-ДПМНЕ и ДУИ во цел мандат. Во јавност се караа на маса ги делеа бизнисите. Но ВМРО-ДПМНЕ поинаку и не знае да владее освен да одржува некоја тензија постојана што е огромна штета за граѓаните“,
наведуваат од СДСМ во партиското соопштение.
Министерот за здравство Арбен Таравари, кој е дел од коалицијата „Вреди“, денеска од Њујорк изјави дека односите меѓу владините партнери се коректни, но оти е потребна почеста консултација и синхронизација меѓу партиите во власта. Според него, реакцијата на Снопче во врска со законот за бранители била како што треба, но се надева дека владиното мнозинство ќе има координација за надминување на овој, како што рече, ситен проблем, за кој прстот го впери во СДСМ и ДУИ оценувајќи дека подметнуваат искри во владејачката коалиција.