Од Социјалдемократскиот сојуз по вчерашната седница на Централниот одбор велат дека истрагата се води селективно и дека во „соодветен момент“ преку анкетна комисија во Собранието ќе бараат утврдување на фактите, како и политичка одговорност за трагедијата во Кочани
Актуелните состојби во земјата по трагедијата во Кочани во која загинаа 59 луѓе била една од главните теми на синоќешната седница на Централниот одбор (ЦО) на опозицискиот Социјалдемократски сојуз (СДСМ). Како што информираа од партијата денеска, заклучокот на Централниот одбор бил дека досегашниот тек на истрагата за пожарот во т.н. кабаре покажува дека таа се води селективно и е насочена само кон поранешни функционери и службеници.
„Заклучок на Централниот одбор на СДСМ е дека досегашниот тек на истрагата покажува дека се води селективно и е насочена само кон минатото, само кон поранешни функционери и службеници, додека воопшто не се опфатени актуелните функционери и службеници, иако биле на функции на денот кога се случила трагедијата“,
се вели во соопштението на СДСМ во врска со седницата на ЦО, која, како што посочуваат оттаму, почнала со едноминутен молк на членовите на највисокиот орган на партијата во знак на почит кон жртвите од трагедијата и сочувство со болката и тагата на нивните семејства.
Од опозициската партија, во тој контекст, наведуваат дека селективноста не е правда, туку неправда што ја продлабочува недовербата на граѓаните во институциите и во правосудството.
Недозволиво е, додаваат оттаму, истрагата да се води на селективен начин, имајќи ја предвид сериозноста на трагедијата и тешките последици со огромен број жртви и повредени.
„СДСМ инсистира на неселективна, независна и темелна истрага во која сите ќе одговараат согласно законите. На било каква селективност, штитење на актуелни функционери, на поединци блиски до власта, СДСМ ќе се спротивстави. Пред законот сите мора да бидат еднакви“,
се вели во соопштението.
Во оваа насока, од Социјалдемократскиот сојуз велат дека ќе ги искористат сите институционални механизми и најавуваат дека во „соодветен момент“ преку анкетна комисија во Собранието ќе бараат утврдување на фактите, како и политичка одговорност за трагедијата во Кочани.
Во пожарот што се случи во т.н. кабаре „Пулс“ во Кочани на 16 март загинаа 59 лица, а околу 200 повредени се лекуваат во болниците во земјава и во странство.
Досега во истрагата се осомничени 34 лица, од кои 27 во постапка што ја води Основното јавно обвинителство Кочани со тим од 11 обвинители, додека седум поранешни високи полициски службеници се гонат во истрага што ја отвори Основното јавно обвинителство за гонење организиран криминал и корупција (ОЈО ГОКК). Од Обвинителството инсистираат дека истрагата е во рана фаза и дека проверките продолжуваат.