Вака утринава реагираат од опозицискиот СДСМ откако синоќа во интервју за „360 степени“, министерот за здравство изјави дека изборот на Бојан Христовски за прв човек на АНБ бил на премиерот Мицкоски. Рече дека за него немаат доволно информации
Поставувањето на Бојан Христовски на чело на Агенцијата за национална безбедност е личен избор на премиерот Христијан Мицкоски, а партизацијата во АНБ ја потврди и коалицискиот партнер Арбен Таравари.
Вака утринава реагираат од опозицискиот СДСМ откако синоќа во интервју за „360 степени“, министерот за здравство изјави дека изборот на Христовски за прв човек на АНБ бил на премиерот Мицкоски. Рече дека за него немаат доволно информации.
„Дури и на оние на кои не им беше јасно, сега им е кристално јасно сè. Поставувањето на Христовски на директорската позиција на АНБ е избор и директива на Мицкоски. Тој сака свој човек кој во целост ќе го контролира и ќе му служи само нему и на ДПМНЕ. Мицкоски го враќа времето на директни злоупотреби на безбедносните служби во партиски и лични цели како што беше во минатото. Затоа по секоја цена се турка партиски кадар – претседател на Градски комитет на ДПМНЕ, близок до Мицкоски, спротивно на член 10 од Законот за АНБ и со многубројни сомнежи дали воопшто ги исполнува критериумите за оваа позиција“,
велат од СДСМ.
Од партијата се уште го сметаат за отворено прашањето дали Христовски има петгодишен стаж на раководни позиции согласно законските услови, обвинувајќи оти во неговата биографија нема прецизни датуми за раководно искуство од 2012 до 2017 година. Оттаму велат оти нема потврда ниту за тоа дали првиот човек на АНБ има вистински документ за соодветно познавање на англискиот јазик, зашто, како што велат, документот што го приложил е од училиште во Пловдив, Бугарија, каде што воопшто нема ТОЕФЛ-центар за тестирање.
„Ова се премногу спорни работи за вака важна позиција. Затоа Христовски треба да биде разрешен и да биде назначен нов директор на АНБ. Професионализмот мора да се заштити и АНБ да биде во функција на државните интереси, а не на интересите на Мицкоски и ВМРО-ДПМНЕ“,
додаваат од опозициската партија.