Ваквата мерка, оценуваат од опoзициската партија ќе придонесе за дополнителна дестимулација за вработување на младите, кои поради неповолните услови за пензионирање, уште повеќе ќе бараат егзистенција надвор од државата
Социјалдемократскиот сојуз на Македонија (СДСМ) остро се спротивставува на предлогот за зголемување на старосната граница за заминување во пензија на 67 години, соопштија од партијата по денешната прва седница на новиот Извршен одбор, додавајќи дека таквиот чекор би претставувал директен удар врз работниците, нивното достоинство и труд.
Според опозициската партија, станува збор за продолжување на погрешните политики за систематско потценување и експлоатација на трудот на граѓаните и работниците од страна на Владата, предводена од ВМРО-ДПМНЕ.
„Наместо да обезбедат покачување на платите и подобри услови за работниците, власта сака на мала врата да протне мерки кои ќе ги примораат работниците да работат подолго само за да се финансираат трошоците од нивните популистички потези“,
се вели во соопштението од СДСМ.
Ваквата мерка, оценуваат од опизициската партија ќе придонесе за дополнителна дестимулација за вработување на младите, кои поради неповолните услови за пензионирање, уште повеќе ќе бараат егзистенција надвор од државата.
Од СДСМ велат дека нивните политики во изминатите години, додека беа на власт, успеале да го стабилизираат Фондот за пензиско и инвалидско осигурување (ФПИОМ) и значително да ја намалат финансиската дупка, односно дефицитот, од 43 отсто на 33 отсто.
„Сега ДПМНЕ спроведува погрешни политики со кои ja загрозува одржливоста на Фондот, го зголемува дефицитот. Нашиот приоритет е заштита на интересите на работниците и обезбедување услови за достоинствен живот. Наместо продолжување на работниот век, потребни се итни мерки за подобрување на животниот стандард и создавање перспективи за сите граѓани со праведна и одржлива пензиска политика“,
велат од опозициската партија.
Инаку, предлогот мажите и жените да одат во пензија на 67 години, со цел одржување на Фондот на ПИОМ, намалување на фискалните ризици и за консолидација на буџетот во наредниот среднорочен период, пред два дена дојде од Фискалниот совет, независно тело што изработува анализи и мислења за макроекономските и за фискалните претпоставки користени за изработка на Буџетот на државата и фискалната стратегија.
Предлогот го отфрлија и од Владата и од ВМРО-ДПМНЕ, а од владејачката партија денеска преку соопштение рекоа дека тоа е затворена тема за нив.
Оттаму ја обвинија опозициската СДСМ за лицемерие и дволичност, додавајќи дека додека била на власт економијата имала највисок пад во историјата.
„Тоа што не сфаќаме е како истите луѓе кои молчеа додека се ограбуваше државата, додека инфлацијата растеше вртоглаво, додека институциите ги распаѓаа или тие лично или нивните најблиски соработници, сега глумат душогрижници, дали мислат дека народот им верува? Лицемерието и дволичноста на СДС се добро познати на граѓаните“,
рекоа од ВМРО-ДПМНЕ.
На препораката на Фискалниот совет за зголемување на старосната граница за пензионирање вчера реагираа и од Сојузот на синдикатите на Македонија (ССМ), чиј претседател Слободан Трендафилов ја оцени како сериозно загрижувачки предлог.
„Доколку членовите на Фискалниот совет сакаат да помогнат во крпење на буџетот во Фондот за пензиско, можеби треба да почнат да плаќаат придонеси од задолжително социјално осигурување за сите нивни приходи што ќе претставува пример и за останатите кој треба да се следи!“,
изјави Трендафилов за МИА.
Инаку претседател на Фискалниот совет е Глигор Бишев, поранешен директор на Шпаркасе банка. Членови се и академик Абдулменаф Беџети, како и Марина Трпеска, редовен професор на Економскиот факултет при УКИМ. Советот, освен зголемување на старосната граница за пензионирање, предлага и зголемување на стапката за пензиско осигурување за 0,7 процентни поени, односно таа да изнесува 19,5 проценти.