Изјавата на портпаролот на СДСМ, Дарко Каевски, следува откако вчера портпаролот на најголемата опозициска партија изјави дека ВМРО-ДПМНЕ сè уште нема одлучено дали ќе учествува во техничката влада што треба да биде избрана сто дена пред одржувањето на парламентарните избори, а која ќе биде предводена од Талат Џафери
Евентуалното неучество на ВМРО-ДПМНЕ во техничката влада на сто дена пред изборите би било барање алиби за изборниот пораз. Ова, одговарајќи на новинарски прашања на денешната прес-конференција, го изјави портпаролот на владејачкиот СДСМ, Дарко Каевски, откако вчера од опозициската ВМРО-ДПМНЕ соопштија дека сè уште не е одлучено нивното учество во преодната влада.
„Деструктивните политики на ДПМНЕ, блокадите, обидите да се закочи земјата, да се блокира Собранието, ги гледаме со години наназад. ДПМНЕ друго и не знае, бидејќи нема понуда за граѓаните. Не се нешто ново обиди за создавање криза. Како што досега не успеа така нема ниту овој пат. Нема да најде алиби, Мицкоски го чека двоен пораз на изборите, тој го знае тоа многу добро“,
изјави портпаролот на СДСМ на денешната прес-конференција.
Изјавата на Каевски следува откако вчера портпаролот на најголемата опозициска партија изјави дека ВМРО-ДПМНЕ сè уште нема одлучено дали ќе учествува во техничката влада што треба да биде избрана сто дена пред одржувањето на парламентарните избори, а која ќе биде предводена од Талат Џафери.
Одлуката за тоа дали и евентуално со кои имиња би учествувале во таква влада, во периодот што следува ќе ја носат органите на ВМРО-ДПМНЕ.
Според Законот за Владата, во техничката влада на сто дена пред изборите, најголемата опозициска партија добива министри за внатрешни работи и за труд и социјална политика, како и дополнителни заменик-министри во неколку ресори со врзан потпис со министерот.