Од партијата на премиерот Мицкоски нагласуваат дека амбиенталниот воздух е посебно загаден во зимските денови со почетокот на грејната сезона, што јасно става до знаење дека начинот на затоплување на домовите е еден од причините за загаденоста. За таа цел, додаваат, Владата веќе реализирала една од мерките за субвенции за инвертер-клими за граѓаните која ќе продолжи и понатаму
Владата на ВМРО-ДПМНЕ, не само што не презема ништо за да го намали загадувањето на воздухот туку во предложениот буџет за 2025 година ги намали средствата за животна средина, за енергетика и квалитет на воздух, реагираат денеска од СДСМ.
„Во Министерството за животна средина има предвидено повеќе пари за вработувања, а помалку пари за заштита за животната средина, односно намалување на парите за 25 отсто. За квалитет на воздух исто така власта ги намалува парите од од 46 415 на 22 771 милиони денари што е намалување од 51 отсто. Има помалку пари за развој на енергетиката, намалување од 406 331 на 243 100 милијарди денари. Парите за гасификација се речиси преполовени, додека за енергетска трансформација нема ништо“,
велат социјалдемократите.
Според нив, премиерот Христијан Мицкоски најавил гасна конгенеративна централа со која ќе се намали загадувањето, а во буџетот не се предвидени пари за тоа.
„Ја нема ниту ветената 1 милијарда евра инвестиции за намалување на загадувањето за 50 отсто. Со повеќе пари за плати, а со помалку за животна средина власта покажува дека нема намера ништо да преземе против загадувањето и граѓаните ќе продолжат да се гушат“,
обвинија од СДСМ.
Од владејачката ВМРО-ДПМНЕ, пак, вратија дека загадувањето на воздухот не е проблем што може да се реши во четири месеци власт предводена од нив. Оттаму како главен виновни за загадувањето ги посочија СДСМ и ДУИ.
„Нивото на загаденост на воздухот е високо затоа што опозициските душегрижници, СДС и ДУИ седум години на власт не направија ништо и не преземаа никакви системски мерки кои до сега би дале ефект. Владата предводена од ВМРО-ДПМНЕ сериозно и посветено работи на спроведување и изнаоѓање решенија за системско решавање на проблемот со загадениот амбиентален воздух“,
велат од ВМРО-ДПМНЕ.
Од партијата на премиерот Мицкоски нагласуваат дека амбиенталниот воздух посебно е загаден во зимските денови со почетокот на грејната сезона, што јасно става до знаење дека начинот на затоплување на домовите е еден од причините за загаденоста. За таа цел, додаваат, Владата веќе реализирала една од мерките за субвенции за инвертер-клими за граѓаните која ќе продолжи и понатаму.
„Дополнително, Владата исто така, ќе обезбеди субвенции и за фирмите кои ќе користат чисти енергетски решенија. Исто така, ќе се воведат строги ограничувања за најштетните извори на енергија и ќе се контролираат најголемите индустриски загадувачи. Освен ова, Владата ќе започне и програма за масовно пошумување и засилено чистење на јавните простори. Сите овие мерки од кои што дел веќе се имплементираат, паралелно со забрзаната гасификација на Македонија и изградбата на когенеративната централа, ќе значат долготрајни решенија за намалување на загаденоста на воздухот и кои на среден рок ќе обезбедат почиста животна средина“,
порачаа од ВМРО-ДПМНЕ.