Според Тренчевска, ова е ударна економска мерка за поголеми плати со која 400 илјади работници со плата до 65 380 денари ќе добијат повисоки примања
Законот за ослободување од плаќање придонеси за зголемени плати што го поднесоа од пратеничката група на Социјалдемократскиот сојуз на Македонија (СДСМ) денеска е на дневен ред на собраниска седница.
Пратеничката од СДСМ, Јована Тренчевска, денеска ги повика пратениците да гласаат за овој закон со кој платите може да се зголемат од 3 000 до 15 000 денари, а компаниите ќе бидат ослободени од плаќање придонеси за зголемениот дел.
Според Тренчевска, ова е ударна економска мерка за поголеми плати со која 400 илјади работници со плата до 65 380 денари ќе добијат повисоки примања.
„Ги повикуваме сите пратеници кои се на страната на граѓаните, на страната на работниците, да гласаат и да го поддржат ова законско решение. Платите мора да растат. Ова не е само економија – ова е борба за работничко достоинство, сигурност и подобар живот“,
рече Тренчевска на прес-конференција во Собранието.
Таа вели дека законот го имаат поднесено бидејќи животниот стандард на граѓаните е на дното.
„Цените растат, а платите тапкаат во место. Власта одбива да ги покачи платите и работниците ги држи со најниски плати во регионот. Потрошувачката кошница во февруари 2025 година достигна 63 773 денари, за 100 евра е зголемена во споредба со лани. Две минимални плати не се доволни за да се покријат основните месечни трошоци на едно семејство“,
додаде Тренчевска.
Според неа, наместо покачување на платите, покачување на минималната плата и грижа за стандардот на народот, власта ги турка погрешните политики на ВМРО-ДПМНЕ.
„Првпат минималната плата е договорена без социјален дијалог, без учество на синдикатите. Резултатот? Покачување од срамни 1 800 денари, далеку од потребното и далеку од она што го заслужуваат работниците. Истовремено, власта не го почитува ниту општиот Колективен договор – не ги зголемува платите во јавниот сектор за предвидените 12,5 отсто“,
рече таа.
Предлог-законското решение за покачување на платите до 15 илјади денари за 400 илјади работници СДСМ го поднесе на почетокот на минатиот месец.
Во законското решение се предлага придонесите за пензиско, здравствено и социјално осигурување да се замрзнат на просекот од последните три исплатени плати на работникот и тоа да важи во период од една година, што значи, како што рече таа, дека работодавачите нема да имаат дополнителен финансиски товар при зголемување на платите.
Ослободувањето може да го добијат компаниите што на работниците им исплаќаат нето-плата која не е повисока од 65 380 денари, а такво покачување би можеле да добијат околу 400 илјади работници.