Костовски најави дека СДСМ ќе продолжи да ги објавува сите детали и да ги поставува сите правно издржани прашања, „кои укажуваат на сериозни пропусти и кривични одговорности за лица за кои во моментов нема информации дека се дел од истражната постапка или се во притвор“
СДСМ дава поддршка на независна, темелна и неселективна истрага за трагичниот пожар во Кочани во кој животот го загубија 59 млади лица и ги поддржуваме институциите во тоа, но стравуваме дека оваа истрага ќе биде селективна, велат од најголемата опозициска партија.
„Оставивме седум дена органите на правосудството да покажат дека спроведуваат независна, темелна и пред сè неселективна истрага за овој стравотен настан. Од првиот ден СДСМ бара сите одговорни, поранешни и сегашни функционери, службеници и политичари, да одговараат согласно законот. СДСМ дава поддршка на независна, темелна и неселективна истрага и ги поддржуваме институциите во тоа. Ова гласно го бараат и граѓаните. Но денес, седум дена подоцна, сме должни да ги поставиме вистинските прашања кои се наметнуваат за кои за жал, нема одговор од надлежните институции“,
изјави на прес-конференција Мартин Костовски, организациски секретар на СДСМ.
Тој упати неколку прашања до министерот за внатрешни работи Панче Тошковски и државниот јавен обвинител Љупчо Коцевски:
„Дали е точно дека: Ниеден од командирите, инспекторите, и раководството на БЈБ и МВР во ОВР Кочани и СВР Штип, кои мора да знаеле што се случува, не се во притвор? Дали и против кој од нив се води истрага? И ако не се води, како е возможно да не се истражуваат лица кои вечерта биле на одговорни позиции, со должност и овластување да реагираат – но не го сториле тоа? Дали е точно дека сите седум вработени во МВР, кои се моментално во притвор, не биле на функции на денот на пожарот во дискотеката?“.
Според Костовски, Законот за јавни собири јасно упатува на тоа за кои јавни собири е одговорна полицијата.
„Според информациите, на овој настан имало 650 луѓе. Согласно законот, полицијата била должна да има оперативни сознанија за настанот и соодветно да го обезбеди овој настан дури и во случај ако тој не е пријавен од организаторот. МВР во Кочани тоа не го направиле. Ако МВР постапеле согласно законот, ќе имало обезбедено Противпожарна бригада, Брза помош, соодветен број полициски службеници и сите придружни безбедносни мерки за ваков тип настани, со што несреќата можела дури и да се превенира. Од снимките вечерта се гледа дека полицијата била присутна во објектот. Ова значи дека знаеле за настанот, но не го обезбедиле соодветно. Со ова се поставува прашањето, дали сите надлежни од МВР таа вечер сториле кривично дело со несторување односно непостапување? Дали се изземени од одговорност службеници, началници и командири кои вечерта биле на должност? Доколку истрагата во продолжение не ги опфати и нив, СДСМ со својот правен тим ќе поднесе соодветни кривични пријави“,
нагласи Костовски.
Тој најави дека СДСМ ќе продолжи да ги објавува сите детали и да ги поставува сите правно издржани прашања, кои укажуваат на сериозни пропусти и кривични одговорности за лица за кои во моментов нема информации дека се дел од истражната постапка или се во притвор.