Пред три дена бугарската новинска агенција БГНЕС објави дека целото семејство на министерката за енергетика Сања Божиновска се бугарски државјани
Министерката за енергетика Сања Божиновска ги излажа граѓаните дека се откажала од бугарското државјанство и бугарскиот пасош, реагираат од опозицискиот СДСМ откако бугарската агенција БГНЕС пред неколку дена објави дека целото семејство на Божиновска имаат бугарско државјанство.
„Божиновска тврдеше дека се откажала од бугарското државјанство и бугарскиот пасош, но јавноста преку медиумите во Бугарија дозна дека не само што сè уште има бугарско државјанство туку и целото нејзино семејство има бугарско државјанство и пасош. Божиновска исто така сè уште нема одговорено ниту за долгот на фирмите од 1 милион евра. Граѓаните не може да имаат доверба во неа кога таа ја крие вистината и ги лаже“,
велат од опозицискиот СДСМ.
Пред три дена бугарската новинска агенција БГНЕС објави дека целото семејство на министерката за енергетика Сања Божиновска се бугарски државјани.
На прес-конференција минатата недела, на прашање на „360 степени“ дали сè уште поседува бугарско државјанство, Божиновска одговори дека поседува македонско и чешко државјанство. Со оглед дека повторно децидно не одговори, ја прашавме дали може да стави на увид на јавноста документ од бугарските власти со кој се потврдува дека е прифатено нејзиното барање за отпуст, односно дека веќе не е бугарска државјанка.
„Ќе проверам со адвокатите и ќе ве известам“,
рече таа.