Од СДСМ велат дека не постои никаков критериум за изборот на Христовски, покрај тоа што е член на ВМРО-ДПМНЕ
За само десет дена Арсовска го менува директорот на ЈП „Градски паркинг”, кадар на ВМРО-ДПМНЕ. Новиот директор на Јавното претпријатие Бојан Христовски е контраразузнавач, поранешен припадник на Управата за безбедност и контраразузнавање, кој нема добиено безбедносен сертификат за да може да се префрли во Агенцијата за национална безбедност, изјави на денешната прес-конференција Мартин Попов, советник во Град Скопје од редовите на СДСМ.
Попов вели дека таткото на новоизбраниот директор учествувал во „крвавиот четврток“ во Собранието на 27 април и дека таков човек не е компетентен да биде директор.
Реакцијата од СДСМ пристигнува откако градоначалничката на Скопје, Данела Арсовска, вчера го разреши директорот на ЈП „Граски паркинг“ Филип Пасху кој го постави пред само десетина дена, а на негово место го избра Бојан Христовски.
Од СДСМ велат дека не постои никаков критериум за изборот на Христовски, покрај тоа што е член на ВМРО-ДПМНЕ.
„По ниту еден професионален критериум Христовски не е соодветно решение за да води јавно претпријатие, освен што е кадар на ВМРО-ДПМНЕ. Дополнително, Аросовска со промената во период од 10 дена на директор, ги потврдува сомнежите дека поставува некомпетентни кадри на високи раководни позиции во градот. За што Арсовска го има наградено Христовски со директорски ангажман? Арсовска треба да излезе пред граѓаните и да одговори на овие прашања“,
смета Попов.