Претходно вчера, СДСМ поднесе пријава до Државната комисија за спречување на корупцијата, повикувајќи ја да отвори предмет и да ги испита сите елементи од случајот
Опозицискиот СДСМ бара Јавното обвинителство да постапи во врска со наводите дека компанијата „Дигитал оне“, формирана во август лани, за неколку месеци годинава добила државни тендери во вредност од речиси девет милиони евра. Го повикаа Обвинителството да не молчи пред големиот корупциски скандал и да постапува.
„Крадењето на народот преку корупциски шеми за пумпање на парите мора да запре и да следува одговорност. Станува збор за девет милиони евра пари на граѓаните кои треба да завршат кај граѓаните, а не по џебовите на врхушката на власт и во Белата палата. Јавно и детално, со факти и докази веќе ја презентиравме целата корупциска шема. Сите докази се јавно достапни, објавени, проверливи и повеќе од доволни за старт на истрага“,
изјави портпаролката на СДСМ, Богданка Кузеска.
Претходно вчера, СДСМ поднесе пријава до Државната комисија за спречување на корупцијата (ДКСК), повикувајќи ја да отвори предмет и да ги испита сите елементи од случајот.
Во интервјуто за „360 степени“ во понеделникот, премиерот Христијан Мицкоски изјави дека доколку постои каков било сомнеж за сторен криминал во поврзан со фирмата „Дигитал оне“, СДСМ може веднаш да достави докази до, како што рече, нивните инсталации во обвинителството.
Изминативе денови СДСМ обвинува дека власта преку криминални шеми и тендери испумпува милиони евра народни пари до фирми блиски до владејачката ВМРО-ДПМНЕ. Во фокус е фирмата „Дигитал оне“, формирана во август минатата година, која од денот на формирањето до денес добила шест договори за јавни набавки со владини институции, од кои четири со Генералниот секретаријат на Владата.