Потпретседателката на СДСМ, Каја Шукова, на прес-конференција денеска рече дека без оваа мерка стотици илјади работници ќе продолжат да работат за плата што не е доволна ниту за покривање на основните трошоци
Опозицискиот Социјалдемократски сојуз на Македонија (СДСМ) денеска излезе со став со кој бара и поддржува зголемување на минималната на 500 евра бидејќи, како што кажа потпретседателката на партијата Каја Шукова, цените растат неколкукратно побрзо од платите.
Инаку, со барање за зголемување на минималната плата на 500, наместо 450 евра, како што беше првичниот предлог, неделава излегоа и од Сојузот на синдикатите на Македонија.
Образложувајќи го барањето, Шукова на прес-конференцијата наведе дека економските индикатори и факти за животот во Македонија зборуваат јасно дека животниот стандард на граѓаните е во постојан пад, истовремено обвинувајќи ја Владата дека не презема никакви конкретни мерки за да ја подобри економската состојба.
Според попретседателката на СДСМ, Владата не само што не презема ништо, туку и не прифаќа ништо што ќе понуди опозицијата, а што, како што кажа, се докажани мерки за намалување на трошоците за живот.
„Фактите покажуваат дека цените растат неколкукратно побрзо од платите и граѓаните од ден во ден можат да си дозволат сè помалку. Струјата е поскапена за 20 до 30 отсто, парното за 5 отсто и дополнително ќе расте, услугите се вивнати до небо. Цените на основните прехранбени производи се зголемени за 30 проценти. Владата најавува некаков економски бум кој не постои. Едноставно економските показатели се брутално точни и нема да се случи никаков раст на економијата, за жал. Индустриското производство паѓа четири месеци по ред, додека извозот е намален за 5,9 проценти. Откако пропаднаа сите кошнички, новогодишни и неновогодишни, јасно е дека Владата нема стратегија за спречување на расотот на цените. Прашање е дали воопшто и сака“, рече Шукова.
Последната шанса, како што рече таа, е Владата итно да интервенира со платите и со тоа да покаже минимум почит кон граѓаните.
„СДСМ бара и поддржува покачување на минималната плата на 500 евра бидејќи ова ќе поттикне раст на сите плати. Оваа стратегија која СДСМ доследно ја спроведуваше додека беше на власт даваше резултати. Благодарение на овој пристап, со СДСМ беа потребни само две минимални плати да се покрие потрошувачката кошничка, а денес со ДПМНЕ се потребни три“, рече Шукова.
Како што наведе таа, ако минималната плата не се зголеми на 500 евра, тоа ќе значи дополнително влошување на животот за илјадници семејства, кои едвај врзуваат крај со крај.
Додаде дека покачувањето на платите е единствениот начин да се спречи понатамошното осиромашување на граѓаните и да се овозможи економски напредок.
„Без оваа мерка, стотици илјади работници ќе продолжат да работат за плата што не е доволна ниту за покривање на основните трошоци“, порача потпретседателката на СДСМ.
Синдикатите во понеделникот побараа минимална плата од 500 евра наместо 450, за кои притискаа речиси една година.
Месецов минималецот треба да се зголеми на 24 500 денари, а од ССМ предлагаат тој да биде 30 500 денари, а за разликата од 6 000 денари, работодавачите да бидат ослободени од придонеси, односно да добиваат субвенции во следните 12 месеци.
Овој предлог, како што рекоа, ќе го пратат и до Владата и до Собранието. Со дел од бизнисот велат дека имале средба и генерално се со сличен став околу минималецот. Премиерот Мицкоски, пак, одговарајќи на новинарски прашања на темата, рече дека чека да види дали двете страни ќе постигнат договор.
„Тоа не зависи од Владата, тоа зависи дали работниците и работодавачите ќе постигнат договор и дали таму ќе има консензус, а ние како влада ќе го поддржиме тој договор, во спротивно ќе одиме според законот“, изјави премиерот Христијан Мицкоски, пренесе ТВ Телма
Минималната плата се очекува да биде една од темите за која ќе се отвори дискусија на новиот Економско-социјален совет, кој треба да се одржи месецов. Владата сè уште нема формирано Комисија која треба да ја потврди репрезентативноста на ССМ, нешто без што не може да се одржи средбата меѓу Владата, работодавачите и синдикатите.