„Потврдените информации дека бебето било одбиено да биде хоспитализирано се крајно загрижувачки. СДСМ бара подлабока анализа и целосна транспарентност во процесот на утврдување на одговорноста. Јавноста заслужува да знае каде се направени пропустите“, велат од опозициската партија
Министерството за здравство и сите надлежни институции итно да ги преземат сите неопходни мерки за да се утврдат причините за трагичната смрт на 14-месечното бебе на Клиниката за детски болести, реагираат од опозицискиот Социјалдемократски сојуз на Македонија (СДСМ).
Од партијата преку соопштение велат со голема загриженост ги следат информациите за случајот, за кој, како што посочуваат, мора да има одговорност.
„Потврдените информации дека бебето било одбиено да биде хоспитализирано се крајно загрижувачки. Ова е втор трагичен случај за една недела во здравствените установи. СДСМ бара подлабока анализа и целосна транспарентност во процесот на утврдување на одговорноста. Јавноста заслужува да знае каде се направени пропустите“,
велат од СДСМ.
Во контекст на случајот, оттаму велат дека во изминатите седум години, додека СДСМ беше на власт, успеале неколкукратно да ја намалат смртноста на новороденчињата, која во 2016 година изнесувала високи 25 отсто, а во 2021 била намалена на 8,9 отсто, додека во 2023 година се движела околу 5 отсто.
„Неонаталната смртност СДСМ ја намали за 5 пати, во 2015 година изнесувала 6,8 отсто, а во 2022 година е намалена на само 1,4 отсто. Во 2015 година во времето на ДПМНЕ перинаталната смртност изнесувала 12,8, отсто, а во 2022 година е намалена на 6,9 отсто. СДСМ набави модерни инкубатори, кои недостасуваа, како и повеќе современи апарати, опрема, микроскопи, системи за деминерализација, респираторни машини, подвижни протокомери за кислород и инвестираше во развој на соодветен стручен кадар. Оттука, крајно загрижувачки е тоа што се случува сега и надлежните мора да преземат соодветни мерки да не се дозволи зголемување на смртноста на новоредничањата повторно“,
се наведува во соопштението на опозициската партија.
Четиринаесетмесечното бебе почина во саботата на Детската клиника при Клиничкиот центар „Мајка Тереза“, каде што, како што информираа од Министерството за здравство, било хоспитализирано со тешка респираторна инфекција, со засегнати витални функции и во тешка општа здравствена состојба.
Телото на бебето е пратено на обдукција, која треба да ја утврди точната причина за смртта.
Министерот за здравство, Арбен Таравари вчера во изјава за медиумите потврди дека бебето претходно било одбивано за хоспитализација. Тој рече дека ги знае деталите за случајот, но не сакаше да ги коментира причините за одбивањето оти, како што кажа, сите информации ги очекува од комисијата која денеска треба да иг истражи двете клиники каде што било лекувано бебето, односно Детската клиника и Клиниката за респираторни заболувања кај децата „Козле“.
Каков и да биде исходот од инспекцијата, Таравари рече дека одговорност мора да има.
„Дали поради лекарска грешка или незнаење треба да се констатира. Дефинитивно треба да има одговорност. Меѓутоа не очекувајте од мене уште од денес да судам како било. Дозволете соодветните органи во државата да испитаат сè во детали. На крајот некој мора да сноси одговорност кога има вакви трагични случаи во здравствениот систем“,
изјави Таравари.
Министерот дополнително изјави дека наследиле здравствен систем кој не може среди за краток рок. Во врска со конкретниот случај, тој рече дека сите кои биле на смена во моментот кога бебето починало биле стручни лица.