Американскиот фармацевтски концерн „Модерна инк“ објави дека конечните клинички испитувања за вакцината против ковид-19 ќе започнат на или околу 27 јули.
Станува збор за третата, клучна фаза на тестирање на луѓе на вакцината мРНА-1273.
Клиничкото испитување го спроведува Националниот институт за здравство, а американската влада инвестираше близу половина милијарда долари во проектот на „Модерна“.
Завршните клинички испитувања ќе бидат спроведени на 87 локации во САД.
Во испитувањата ќе бидат вклучени околу 30 000 возрасни лица кои имаат големи шанси да се заразат со коронавирусот, објави фармацевтскиот концерн.
Со испитувањето ќе се спореди бројот на новозаразени меѓу лицата што ја примиле новата вакцина и оние што примале плацебо.
Експерименталната вакцина ќе биде тестирана во 30 држави во САД. Половина од нив се сојузни држави тешко погодени од епидемијата, како Тексас, Калифорнија, Флорида, Џорџија, Аризона и Северна и Јужна Каролина.
По најавите, акциите на „Модерна“ кон средината на вчерашниот ден пораснаа за 2,5 проценти на американската технолошка берза.