Американските власти рекоа дека истрагата, која сè уште е во рана фаза, не ја исклучува можноста проруските елементи да се поврзани со протекувањето на документот, што се смета за најсериозно нарушување на безбедноста од 2013 година, кога повеќе од 700 000 документи беа објавени на Викиликс
Протекувањето доверливи воени документи објавени на социјалните мрежи ги вознемири американските служби, кои се обидуваат да го идентификуваат изворот за кој некои безбедносни експерти се сомневаат дека може да биде некој од САД.
Официјални лица рекоа дека опсегот на темите опфатени во документите, од војната во Украина до прашањата поврзани со Кина, Блискиот Исток и Африка, укажуваат на Американец, а не на сојузник.
„Сега фокусот е дека ова е американско протекување бидејќи голем број документи ги поседувале само САД“,
изјави за Ројтерс поранешниот висок функционер на Пентагон, Мајкл Малрој.
Американските власти рекоа дека истрагата, која сè уште е во рана фаза, не ја исклучува можноста проруските елементи да се поврзани со протекувањето на документот, што се смета за најсериозно нарушување на безбедноста од 2013 година, кога повеќе од 700 000 документи беа објавени на Викиликс.
Двајца американски функционери, вчера изјавија за Ројтерс дека не ја исклучуваат можноста документите да се фалсификувани за да се доведат во заблуда истражителите или да се шират лажни информации против САД.
По протекувањето на документите, Ројтерс пренесува дека прегледале повеќе од 50 документи означени како „Тајна“ и „Топ тајна“ кои првпат се појавија минатиот месец на веб-страниците на социјалните медиуми.
Ројтерс вели дека не ја потврдил автентичноста на документите, но се чини дека некои податоци за проценките на жртвите на бојното поле во Украина се изменети за да се минимизира бројот на руски жртви.
Американските разузнавачки агенции и војската истражуваат колку често чувствителни документи се споделуваат внатре и ги разгледуваат можните мотиви за протекувањето од страна на американски функционер или група.
Истрагата е фокусирана на неколку теории – од незадоволен вработен до инсајдерска закана која сака да ги поткопа националните интереси на Америка.
Иако доверливите документи беа објавени пред неколку недели, за нив првпат извести „Њујорк тајмс“ во петокот.