Амбасадорот (Том) Најдс беше многу јасен во разговорите со израелската влада за прашањето за зачувување на статус кво во светите места во Ерусалим. Акциите што го спречуваат тоа се неприфатливи, изјави портпаролот на американската амбасада во Израел
Израелскиот премиер се обиде да го минимизира инцидентот, но посетата на министерот за национална безбедност Итамар Бен-Гвир ги вознемири и непријателите и сојузниците на Израел кои изразија сомнеж за составот на новата екстремнодесничарска влада
Посетата на ултранационалистички министер во израелската влада, Итамар Бен-Гвир, на џамијата „Ал Акса“ во Ерусалим, откако новата екстремнодесничарска влада на премиерот Бенјамин Нетанјаху ја презеде функцијата минатата недела, предизвика жестоки осуди низ муслиманскиот свет и силен укор од страна на Соединетите Американски Држави, инаку традиционален сојузник на Израел, пишува агенцијата Асошиејтед прес (АП).
„Амбасадорот (Том) Најдс беше многу јасен во разговорите со израелската влада за прашањето за зачувување на статус кво во светите места во Ерусалим. Акциите што го спречуваат тоа се неприфатливи“,
изјави портпаролот на американската амбасада во Израел, пренесува Си-ен-ен.
Од британскиот конзулат во Ерусалим преку соопштение на Фејсбук рекоа дека се загрижени од посетата на Бен-Гвир додавајќи, исто така, дека остануваат посветени на позицијата на статус кво.
Израелскиот премиер се обиде да го минимизира инцидентот, но посетата на министерот за национална безбедност Итамар Бен-Гвир ги вознемири и непријателите и сојузниците на Израел кои изразија сомнеж за составот на новата екстремно десничарска влада.
Бен-Гвир, водач на доселеници на Западниот Брег, кој црпи инспирација од расистички рабин, влегол на местото познато за Евреите како Гората на храмот, а за муслиманите како Благородното светилиште, придружуван од голем контингент полиција.
Неговите планови за посета, објавени претходно оваа недела, предизвикаа закани од милитантната група Хамас во Газа.
„Израелската влада нема да се предаде на убиствена организација, на гнасна терористичка организација“,
рече Бен-Гвир, познат по својата антиарапска реторика и провокативни потези, во видеото снимено за време на посетата.
Обединетите Арапски Емирати, Бахреин, Саудиска Арабија, Катар, Кувајт, Јордан и Египет го осудија чинот на израелскиот министер. Тие го повикаа Израел да ги запре сериозните и провокативни прекршувања што се случуваат таму.
Турција, која неодамна целосно ги обнови дипломатски врски со Израел, ја осуди, како што ја нарече, „провокативната акција на Бен-Гир“. Таа го повика Израел да се однесува одговорно велејќи дека таквите посети би можеле да предизвикаат ескалација во регионот.
Инаку, слични тензии околу спорната локација беа повод за бранови на насилство и претходно.
Посетата на тогашниот опозициски лидер Ариел Шарон во септември 2000 година доведе до судири кои станаа познати како второ палестинско востание.
Судирите меѓу израелските безбедносни сили и палестинските демонстранти во и околу локацијата поттикнаа 11-дневна војна со Хамас во 2021 година.
Портпаролот на Хамас, Хазем Касем, рече дека посетата на Бен-Гвир е „продолжение на ционистичката окупациска агресија против нашите свети места и војната против нашиот арапски идентитет“.
„Нашиот палестински народ ќе продолжи да ги брани своите свети места и џамијата ‘Ал Акса’“,
рече тој.
Либанската група Хезболах, која се бореше против Израел во едномесечната војна во 2006 година, рече дека посетата се заканува да го „разнесе регионот“.
Одговарајќи на негодувањето, Нетанјаху доцна вчера рече дека Израел останува посветен на строго одржување на статус кво на локацијата.
Нетанјаху минатата недела се врати на премиерската функција, што е негов шести мандат, водејќи ја најдесничарската влада во историјата на земјата.
Израел го освои стариот град Ерусалим, со светите места на три монотеистички вери, заедно со остатокот од Источен Ерусалим, Западниот Брег и Појасот Газа во Блискоисточната војна во 1967 година.
Палестинците од друга страна полагаат право на тие територии и бараат да бидат дел од идна палестинска независна држава, со Источен Ерусалим како главен град.
Израел го анектира Источен Ерусалим, потег што најголемиот дел од меѓународната заедница не го признава.
Спорот за тоа кому му припаѓа локацијата каде што се наоѓа Гората на храмот лежи во срцето на израелско-палестинскиот конфликт, потсетува агенцијата Асошиејтед прес.