Шефицата на обвинителството за гонење на организиран криминал и корупција, Вилма Русковска, во вечерашното интервју на „360 степени“ зборуваше и за пораката што пред повеќе од една година ја пратила до еден од судиите од Апелациониот суд со содржина дека „ќе ги тресе од гаќи“ бидејќи на Катица Јанева ѝ одобриле куќен притвор.
Содржината на пораката стигна и до јавноста, а судиите од Апелациониот суд тогаш ја протолкуваа како вршење притисок врз нивната работа.
„Пораката ја испратив до судија со кого се знам повеќе од 30 години и не очекував дека ќе заврши во јавноста и дека ќе се сфати како притисок. Сепак, мислам дека Апелациониот суд погреши и со тоа што ја објавија, но и со тоа што правеа колегиуми и мислам дека беа два дена разлика кога прво донесоа решение со кое се одбива барањето за пуштање во куќен притвор и дадоа образложение за тоа, а подоцна го прифаќаат барањето со истите причини со кои што претходно го одбија, само што додаваат дека е самохрана мајка на две деца, полнолетни деца, од кои ќерката има свое семејство“,
рече Русковска.
Додаде дека спровела финансиски истраги за двајца судии, но не наишле на спорни работи.
„Направив финансиска истрага за двајца од судиите, а не за целиот Совет, но не најдовме ништо вон редовните приходи, наследства, денационализација и слично“,
рече Русковска.