Бугарскиот премиер Румен Радев на средбата посочил дека иако бугарските власти немаат цврсти докази за потеклото на беспилотните летала користени во нападите, нема логика Украина да ги уништува сопствените бродови. Сепак, за утврдување на целосната вистина зад нападите, Радев најавил дека официјална Софија ќе ги истражува заедно со своите сојузници од Европската Унија и НАТО
Руската амабасадорка во Бугарија, Елеонора Митрофанова, која беше повикана на средба од страна на бугарскиот премиер Румен Радев, категорично не негирала дека Русија е одговорна за неодамнешните напади со беспилотни летала врз трговски бродови во близина на бугарските територијални води во Црното Море.
Според соопштението на владината прес-служба на Бугарија, амбасадорката му рекла на Радев оти во моментов нема информации од руското Министерство за одбрана во врска со нападите во Црното Море, но истовремено не ја исклучила можноста дека нападите се провокација од трета страна.
Бугарскиот премиер нагласил дека нападите врз трговски бродови во Црното Море се апсолутно неприфатливи и водат кон значителна ескалација на конфликтот. Иако бугарските власти немаат цврсти докази за потеклото на беспилотните летала користени во нападите, Радев оценил дека нема логика Украина да ги уништува сопствените бродови. Сепак, за утврдување на целосната вистина зад нападите, бугарскиот премиер најавил дека официјална Софија ќе ги истражува заедно со своите сојузници од Европската Унија и НАТО.
Во текот на разговорот, Радев истакнал дека Бугарија ќе иницира разговори со Романија и Турција со цел утврдување заеднички предлози за обезбедување на сигурноста на пловидбата во Црното Море.
Средбата Радев – Митрофанова доаѓа откако рано утринава се регистрирани нови напади на два комерцијални брода во бугарските територијални води. Нападите доаѓаат точно една недела откако цел на удари со дронови, исто така, беа две комерицијални пловила во економската поморска зона на Бугарија.