Од бојкот на фудбалски репрезентации кои одбиваат да играат против Русите, губење на финалето на Лигата на шампионите, па сè до откажување на олимпијади, трки и светски првенства кои требаше да се играат на руска територија, се дел од последиците што ги трпи Русија поради инвазијата на Украина
Покрај економските санкции и низата политички осуди на руска адреса, поради инвазијата на Украина, Русија е бојкотирана и на спортски план, а досега се откажаа многубројни спортски настани кои требаше да се одржат на нејзина територија.
Руските кошаркарски тимови, барем периодов, веројатно нема да може да ги играат натпреварите пред домашната публика. Денеска, како што вчера најави руската новинска агенција ТАСС, се очекува раководството на кошаркарската Евролига да објави алтернативна земја во која Русите би настапувале.
„Утре ќе има состанок на Бордот на акционери на Евролигата, на кој ќе се разговара на темата за одржување на претстојните натпревари на руските тимови, а се очекува да биде објавена и алтернативна земја во која ќе се играат натпреварите на тимовите од Русија“,
соопштија вчера од прес-службата на елитното кошаркарско натпреварување.
Русија веќе го загуби и финалето на фудбалската Лига на шампиони. По инвазијата на Украина, УЕФА одлучи наместо во Санк Петербург тоа да се игра во Париз. УЕФА, исто така, додаде дека сите домашни натпревари на украинските и руските клубови и репрезентации, кои учествуваат во европските натпреварувања, ќе се играат на неутрални терени додека не биде донесена нова одлука.
Фудбалските репрезентации на Полска, Шведска и Чешка, исто така, објави дека одбиваат да играат против Русија во квалификациите за Светското првенство 2022 година. Федерациите на овие три земји испратија и заедничко писмо до ФИФА во кое бараат Русија да биде исклучена од плејофот.
И Албанија денеска објави дека одбива да игра против рускиот тим во Лигата на нации на УЕФА.
На фудбалски план, ситуацијата со Русија се одрази и во англиската Премиер лига. Рускиот милијардер Роман Абрамович, кој е сопственик на Челзи и важи за близок до Владимир Путин, се откажа од управувањето на клубот. Иако не стана јасно дали одлуката е привремена или заминува засекогаш, во соопштението кое го издаде Абрамович наведе дека го препушта управување со лондонскиот клуб на повереници од добротворната фондација на клубот.
И Манчестер јунајтед ги повлече спонзорските права на руската авиокомпанија „Аерофлот“, која во 2013 година стана прв руски спонзор во клубот, како и акционер на местото на „Туркиш ерлајнс“.
Меѓународната федерација за автомобилизам, исто така, презеде мерки против Русија, со тоа што ја избриша од календарот трката за Големата награда на Русија. Одлуката била донесена на состанокот на акционерите. Според календарот, Големата награда на Русија требаше да се вози на 25 септември во Сочи.
Русија остана и без организација на шаховската олимпијада која требаше да се одржи во јули и август годината, а Меѓународната шаховска федерација одлучи да не го одржи ниту годишниот конгрес на руска територија.
Европскиот куп во џудо во 2022 година, кој требаше да се одржи во рускиот град Оренбург во мај, исто така се откажа.
И Меѓународната скијачка федерација (ФИС) се запиша на листата на оние што воведоа санкции кон Русија. Според одлуката на ФИС од пред неколку дена, се откажаа или преместија сите натпреварувањата од Светскиот куп што до крајот на актуелната сезона беа закажани на територијата на Русија.
Русија може да го изгуби и Светското првенство во одбојка што треба да се одржи претстојното лето во десет руски града. Франција веќе се закани дека нема да учествува на овој мундијал доколку Русија биде домаќин.