„Русија ги зголемува своите опции и потенцијал за акција со секој изминат ден“, изјави портпаролот на Пентагон, Џон Кирби, додавајќи оти рускиот претседател Путин со овие чекори дополнително ја дестабилизира веќе тензичната ситуација
Во изминатите 24 часа Русија продолжи да испраќа дополнителни војници на украинско-белоруската граница, соопшти Пентагон.
„Русија ги зголемува своите опции и потенцијал за акција со секој изминат ден“,
изјави портпаролот на Пентагон, Џон Кирби, на прес-конференција.
Белата куќа вчера соопшти оти руските воени вежби во Белорусија придонесуваат за ескалација на тензиите околу Украина, а рускиот претседател Путин со ваквите чекори дополнително ја дестабилизира веќе тензичната ситуација.
„Додека ги набљудуваме подготовките за овие воени вежби, повторуваме дека тоа секако придонесува за ескалација, а не за деескалација“,
истакна портпаролката на Белата куќа, Џен Саки.
Таа се осврна на маневрите „Сојузничка решителност – 2022“, како што се всушност наречени руско-белоруските вежби, кои НАТО ги опиша како најголемо распоредување на руски војници во Белорусија од крајот на Студената војна. Вежбите се очекува да започнат денеска.
Во меѓувреме, САД почнаа да префрлаат кон Романија баталјон со борбени возила на пешадијата „Страјкер“, а според американските власти, околу 1 000 војници на НАТО ќе бидат испратени во Романија.
Околу 1 700 американски војници, пак, заминуваат за Полска, од кои околу половина се веќе пристигнати, а се очекува да пристигнат уште во наредните денови, нагласи портпаролот на Пентагон, Кирби.
Велика Британија, пак, вети дека ќе испрати уште 350 војници во Полска, а веќе е испратено противтенковско оружје во Украина.