Како што пренесе руската агенција ТАСС, според одлуката на руската влада, Русија го забранува извозот на шеќер во сите земји до 31 август, а извозот на житарки во поранешните советски држави е забранет до 30 јуни
Русија го забрани извозот на житарки во поранешните советски држави до 30 јуни, а извозот на шеќер го забрани во сите земји до 31 август, јави руската агенција ТАСС.
Рускиот премиер Михаил Мишустин потпиша указ кој предвидува забрана за извоз на бел и нерафиниран шеќер до 31 август, како и извоз на пченица, ‘рж, јачмен и пченка до членките на Евроазиската економска унија до 30 јуни.
„Ограничувањата за извоз на житарките ќе важат до 30 јуни, на шеќерот – до 31 август 2022 година“,
се вели во синоќешното соопштение од владиниот кабинет.
Како што нагласи руската влада, има и низа исклучоци за извозот на шеќер и житарки.
„Така ќе биде можно снабдување со овие производи надвор од Русија, вклучително и за обезбедување хуманитарна помош, како и во рамките на меѓународниот транзитен сообраќај“,
нагласи руската влада.
Одлуката за привремена забрана за извоз на шеќер и житарки е донесена за да се заштити домашниот пазар на храна во услови на надворешни ограничувања.
Како што пренесува ТАСС, претходно беше објавено дека според Министерството за земјоделство на Руската Федерација сега земјата е обезбедена со жито за повеќе од 150 отсто.
Во исто време, привремената забрана за извоз ќе помогне да се спречи протокот на земјоделски производи, имајќи предвид дека земјите од Евроазиската економска унија (Белорусија, Казахстан, Ерменија и Киргистан) веќе ги купиле количините на стоки што им се потребни без царина оваа сезона, соопшти минатата недела прес-службата на Министерството за економски развој на Руската Федерација.
Инаку, Русија и Украина заедно се одговорни за околу 30 отсто од светскиот извоз на пченица и јачмен.
Претходно, и Украина, еден од најголемите европски добавувачи на земјоделски производи, го забрани извозот на ‘рж, јачмен, хељда, просо, шеќер, сол и месо до крајот на оваа година, според одлуката на украинската влада.
Украинскиот министер за аграрна политика и храна Роман Лешченко рече дека чекорите се преземени за да се спречи хуманитарна криза во Украина и да се задоволат потребите на населението за критични прехранбени производи.