Рјабков зборуваше за минатонеделната одлука на американскиот претседател Џо Бајден да го овласти Киев да користи американско оружје за цели во Русија, но само во близина на границата со областа околу украинскиот град Харков, пишуваат Ројтерс и Хина
Рускиот заменик-министер за надворешни работи Сергеј Рјабков во понеделникот изјави дека САД би можеле да се соочат со „фатални последици“ доколку ѝ дозволат на Украина да го користи оружјето што го испорачува за да нападне цели на руска територија.
Рјабков зборуваше за минатонеделната одлука на американскиот претседател Џо Бајден да го овласти Киев да користи американско оружје за цели во Русија, но само во близина на границата со областа околу украинскиот град Харков, пишуваат Ројтерс и Хина.
„Би сакал да ги предупредам американските лидери за погрешните пресметки кои би можеле да имаат фатални последици. Од непознати причини, тие ја потценуваат сериозноста на одговорот што може да го добијат“,
изјави Рјабков за руската новинска агенција РИА.
Тој мислеше на изјавата на рускиот претседател Владимир Путин, кој минатата недела ги предупреди членките на НАТО дека си играат со оган и ризикуваат поширок глобален конфликт.
„Ги поканувам тие личности во Америка да одвојат дел од своето време, кое, судејќи според леснотијата на пристапот, очигледно го трошат на некакви видеоигри, за детално да го проучат тоа што Путин го претстави“,
рече Рјабков.
Директен конфликт меѓу Западот и Русија
Рускиот претседател даде „многу значајно предупредување и тоа мора да се сфати многу сериозно“.
Путин рече дека Западот директно ќе се вклучи во конфликтот во Украина, доколку неговото оружје биде употребено на руска територија, бидејќи за тоа ќе биде потребна негова сателитска, разузнавачка и воена помош.
Генералниот секретар на НАТО, Јенс Столтенберг, минатата недела изјави дека НАТО има право да ѝ помогне на Украина во нејзиното право на самоодбрана и дека тоа не ја прави Алијансата учесник во војната.
Украинскиот претседател Володимир Зеленски му се заблагодари на Вашингтон во текот на викендот што дозволил употреба на американски ракетни системи ХИМАРС во регионот на Харков, но рече дека тоа не е доволно.
Украина долго време предупредува дека ограничувањата поставени од западните земји за употреба на нивното оружје значително ја попречуваат способноста на Украина да се брани.