Решението за нашата земја и за Албанија би можело да биде донесено по писмен пат, кон средината на оваа недела, јави агенцијата повикувајќи се на нацрт-одлука на 27 земји членки на Унијата, во која имала увид
Европската Унија може да почне преговори за членство со Албанија и со Северна Македонија, според нацрт-одлука на 27 земји-членки, до која дошол Ројтерс денеска и, како што се наведува, треба да биде финализирана оваа недела.
Ако биде одобрен старт на преговорите со двете земји, како што оценува агенцијата Ројтерс, ќе се стави крај на двегодишните одложувања и тоа ќе значи нов импулс за сите шест земји од Западен Балкан – Србија, Косово, Црна Гора, Албанија, Босна и Херцеговина и Северна Македонија, кои сакаат да влезат во ЕУ.
„Наспроти надежите на Северна Македонија и Албанија, минатата година Франција и Холандија демонстрираа скептицизам во врска со постигнувањата на овие две земји во делот на демократијата и борбата против корупцијата плашејќи се да дозволат нови членки во време кога кохезијата на ЕУ веќе беше оштетена со заминувањето на Велика Британија“,
пишува Ројтерс.
Париз и Хаг, како што се посочува, ги ублажија своите забелешки минатиот месец и плановите за започнување разговори добија интензитет, и покрај кризата со коронавирусот, при што Брисел сакаше да ја покаже својата решеност да го донесе Балканот во ЕУ.
„Не мислам дека она што се случува ќе ја смени одлуката на земјите членки“,
рече шефот за надворешна политика на ЕУ, Жозел Борел, пред новинарите во петокот.
Ако ниту една земја не се спротивстави, се очекува 27 министри на земјите членки на ЕУ официјално да ја донесат одлуката кон средината на неделава – овој пат писмено, бидејќи состаноците лице в лице се прекинати поради ризиците од коронавирус, додаваат изворите на кои се повикува Ројтерс.