Родителите на деца кои влегуваат во ризична група може да бидат изземени од обврската да се вратат на работа, им порачал Филипче
Претставниците на родителите што ја користеа мерката за продолжено породилно отсуство и кои бараа да не се вратат сега на работа, туку од почетокот на следната година, денеска побараа од Владата оваа мерка да се продолжи од еден до два месеци, за да се адаптираат и да обезбедат згрижување на децата.
Тие денеска беа на средба со премиерот Зоран Заев и со министрите за труд и социјална политика и за здравство, Јагода Шахпаска и Венко Филипче.
Им било ветено дека ќе се разгледаат нивните барања и ќе има флексибилност за одредени специфични случаи.
„Со соодветна медицинска документација, родителите на деца кои влегуваат во ризична група, може да бидат изземени од обврската да се вратат на работа. Сепак, ќе нагласам дека најмалите деца имаат прилично висок имунитет и досега немаме случај на сериозно заболено дете од оваа популација“,
истакнал министерот Филипче, соопштија од владината прес-служба.
Министерката Шахпаска повторила дека од податоците на терен, во градинките има многу слободни места за сите оние родители што досега не ги запишале своите деца и дека ситуацијата се контролира.
Родителите, кои поради пандемијата беа на продолжено породилно отсуство до 6 месеци, од вчера, со одлука на Владата, се враќаат на работните места. Но, изминатите денови тие одржаа два протести на кои порачаа дека тоа не е возможно поради тоа што нема кој да се грижи за нивните деца, дека нема слободни места во градинките како и поради стравот од заразата. Тие побараа продолжување до крајот на годината, што од Владата сметаат дека е непотребно, откако градинките се отворија.