Од осум жртви на трговија со луѓе годинава, седум се малолетни. Резултатите од истражувањата на „Отворена порта“ покажуваат дека децата ги користат социјалните платформи „Снепчет“, „Твитер“, „Инстаграм“ и стапуваат во контакт со лица кои ги познаваат и не ги познаваат
Од осум жртви на трговија со луѓе годинава, седум се малолетни. Трговијата со луѓе како кривично дело сè повеќе се прави преку интернет, а загрижува и фактот што возрасната граница се намалува и доколку жртвите пред десетина години биле од 16 години па нагоре, сега жртвите се од 10 до 17 години. Криминалците сè повеќе ја таргетираат онаа група што најмногу го користи интернетот, а најмалку се информирани за опасностите, информира Министерството за внатрешни работи (МВР) по повод Европскиот ден за борба против трговија со луѓе.
„Користењето на онлајн комуникацијата им овозможува на криминалците поголема анонимност и поголема профитабилносот и поради тоа сè повеќе се ориентираат на регрутирање и контрола на жртвите преку интернет-комуникација“,
вели Магдалена Несторовска, државна секретарка на МВР и национална координаторка за борба против трговија со луѓе.
Таа посочи дека од осум жртви на трговија со луѓе годинава, една е конкретно жртва преку онлајн комуникација.
Според извршната директорка на „Отворена порта“, Јасмина Димишковска Рајковска, модерното време и употребата на интернетот и технологијата ги изложува децата сè повеќе на ризик посочувајќи дека резултатите од нивните истражувања покажуваат дека децата ги користат социјалните платформи „Снепчет“, „Твитер“, „Инстаграм“ и т.н. стапуваат во контакт со лица кои ги познаваат и не ги познаваат.
„Загрижува делот што открива дека најголем дел од нив стапиле во контакт со лице што не го познаваат, а подоцна дел од нив оствариле и физички контакт со такви лица“,
изјави Рајковска.
Родителите, порача Рајковска, треба да внимаваат на кои платформи се децата и да водат малку повеќе контрола за тоа што прават децата и со кого комуницираат на интернет. Истовремено, според неа, треба да се разработат и стратегии за подигање на свеста кај децата за ризикот од интернет и како безбедно да се користи.